Санкт-Петербургдаги Фрунзе туманида ўзбекистонлик тўрт нафар муҳожир София сабзавотлар базасидаги жанжалдан сўнг полиция идорасига олиб келинди, деб хабар беради «78.ru».
Нашрнинг маълум қилишича, 22 август куни соат 15:37 да полициянинг навбатчилик қисмига София сабзавот базасида ўн киши жанжаллашаётгани ҳақида маълумот келиб тушган. Воқеа жойига етиб келган полиция оммавий жанжал бўлмаганини аниқлаган.
Таъкидланишича, можаро икки эркак ўртасида содир бўлган, қолганлар эса уларни ажратишга ҳаракат қилган.
Шундан сўнг воқеага алоқадор сабзавот базасида турли юмушлар билан шуғулланувчи тўрт нафар Ўзбекистон фуқароси ички ишлар бўлимига олиб келинган. Уларнинг барчаси маъмурий жавобгарликка тортилган.
Аввалроқ Москвадаги оммавий муштлашувда қатнашган муҳожирларнинг 46 нафари Россиядан депортация қилингани, Россиянинг Приморск ўлкасида иш берувчи томонидан паспортлари олиб қўйилган ўзбекистонликларга ёрдам берилгани, Ташқи меҳнат миграцияси агентлиги Москвадаги оммавий муштлашувлар бўйича Россиядаги ўзбекистонликларга мурожаат билан чиққани тўғрисида хабар берилганди.
Изоҳ (0)