«Қўлингга қурол олиб, чегарани қўриқла дейишдан, топганингни бериб, чегарачининг овқатини кўтар дейишдан Худонинг ўзи асрасин» — Зоир Мирзаев Афғонистон воқеалари ҳақида

Қашқадарё вилояти раҳбари Зоир Мирзаев вилоятнинг Қамаши туманидаги сайёр қабулда Афғонистон воқеалари ҳақида гапирди. Бу ҳақда «Дарё»га Зоир Мирзаевнинг матбуот котиби Аҳрор Содиқов маълум қилди.

Қайд этилишича, вилоят ҳокими 22 август, якшанба куни Қамаши туманининг Азлартепа қишлоғида бўлиб, қишлоқ аҳолисини қийнаб келаётган муаммони ўрганган.

«Афғонистонда одамлар самолётнинг қанотларига ёпишяпти, қандай бўлмасин мамлакатдан чиқиб кетишни мақсад қилишган. Бугун ҳам 400 нафар қочқин чегарадан ўтиб, Сурхондарёда палатка тикиб, боқиляпти. Тошкентда қанча одам, бутун давлатнинг вакилларига ҳурматли Президентимиз жой бериб, уч-тўрт кундан кейин мамлакатига қайтариб юборяпти. Бу ҳам одамгарчиликнинг намунаси», — деди вилоят раҳбари Афғонистон воқеалари ҳақида гапирар экан.

Зоир Мирзаев қишлоқ фуқаролари билан мулоқот қилар экан, ватан тинчлигига шукрона қилиш лозимлигини таъкидлайди.

«Болангиз кечаси соат иккигача, учгача кўчада юради. Баъзан эрталаб қайтади. Хаёлингизда йўқ, маза қилиб ухлайсиз. Чунки юрт тинчлигидан кўнглингиз хотиржам, чегаранинг эгаси борлигига ишонасиз. Эртага Худо кўрсатмасин, бирор гап бўлса, сичқоннинг ини минг танга бўлиб кетади. ‘Мана, қўлингга қуролни ол-да, Афғонистон чегарасини икки соат қўриқла’, дейишдан, ‘уйингдан топганингни бер, чегарачининг овқатини кўтар’, дейишликдан, ‘ҳарбийлар овқатини тўлаб бер’, деб халққа солиқ солишдан Худонинг ўзи асрасин», — деган вилоят раҳбари аҳолига юзланар экан.

Зоир Мирзаев аҳоли томонидан кўтарилаётган баъзи муаммолар тўқликка шўхлик эканини айтган.

«Биз ва сиз муҳокама қилаётган муаммоларнинг баъзилари тўғри муаммо, аммо тўқликка шўхлик сифатида айтилаётган муаммолар ҳам бор», — дейди вилоят ҳокими.

Аҳрор Содиқовнинг аниқлаштиришича, Зоир Мирзаев Қамаши туманининг Азлартепа қишлоғида аҳолининг ер билан боғлиқ муаммосини ҳал этиш учун борган.

«Шу қишлоқда яшовчи 450 та хонадон вакилларининг ўзбошимчалик билан қуриб олган уй-жойи Чироқчи тумани ҳудуди ҳисобланади. Шу сабаб ҳеч қайси хонадоннинг кадастр ҳужжати йўқ. Бироқ муаммо ечилиши керак. Вилоят раҳбари сенатор сифатида Сенатга таклиф киритиб, азлартепаликлар дуч келган муаммо ечими бўйича фикр билдиришини ва муаммо аҳоли фойдасига ҳал қилинишини билдирди», — дейди Аҳрор Содиқов.

Эслатиб ўтамиз, аввалроқ Афғонистонда этник ўзбеклар ва тожиклар «Толибон»га қарши коалиция тузаётгани ҳақида хабар берилганди.