Хоразм вилоятида ҳуқуқни муҳофаза қилиш органларига йўллаган мурожаатини қайтариб олишни ваъда қилиб, бунинг эвазига пул талаб қилган шахс қўлга олинди, деб хабар беради Бош прокуратура ҳузуридаги департамент.
Маълум қилинишича, Бош прокуратура ҳузуридаги департаментнинг Хоразм вилоят бошқармаси томонидан тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилган. Тадбирда фуқаро Х.Ё. Гурлан туманидаги собиқ муқобил машина трактор парки ва унинг ёрдамчи биноларини гўёки «Г» МЧЖ раҳбари ноқонуний равишда сотиб олгани ҳақида ҳуқуқни муҳофаза қилувчи органларга мурожаат ёзгани аниқланган.
Фуқаро Х.Ё. ёзган мурожаатини қайтариб олиб, ҳаракатдан тўхтатиши эвазига МЧЖ раҳбаридан товламачилик йўли билан 180 миллион сўм талаб қилиб, шундан 4 минг доллар ва 74 миллион сўмни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 165-моддаси (товламачилик) билан жиноят иши қўзғатилиб, тергов ҳаракатлари ўтказилмоқда.
Аввалроқ Фарғонада ўзи билан ишқий муносабатда бўлган эркак видеосини тарқатмаслик эвазига ундан 150 минг доллар талаб қилган аёл ва шерикларига суд ҳукми ўқилгани тўғрисида хабар берилганди.
Изоҳ (0)