Тошкент шаҳрида жанговар револвер сақлаган шахс аниқланди, дея хабар бермоқда пойтахт ИИББ матбуот хизмати.
Олмазор тумани ИИО ФМБ терроризм ва экстремизмга қарши кураш бўлими ходимлари томонидан туманда олиб борилган профилактик тадбирлар давомида маълум бўлишича, туманда яшовчи 37 ёшли О.Ш. қурилиш комплексларидаги таъмирлаш ишлари вақтида бузилган девор орасида қурол топиб, таниши 57 ёшли Х.Г.га бериб юборган.
Х.Г.нинг уйи кўздан кечирилганда ходимлар ўқотар қурол – 1917 йилда ишлаб чиқарилган «Наган» (7,62 миллиметр) жанговар револвери ва 14 та ўқ топган. Қурол ва аслаҳалар ашёвий далил сифатида холислар гувоҳлигида олиб қўйилган.
Х.Г.га нисбатан Жиноят кодексининг 248-моддаси 1-қисми (қурол, ўқ-дорилар, портловчи моддалар ёки портлатиш қурилмаларига қонунга хилоф равишда эгалик қилиш) бўйича жиноят иши қўзғатилиб, қамоққа олиш эҳтиёт чораси қўлланилган. Терговолди текширувлари ўтказилмоқда.
Маълумот учун, Жиноят кодексининг 248-моддасига кўра мазкур жиноятни содир этган шахсларга нисбатан суд томонидан 20 йилгача қамоқ жазоси қўлланилиши мумкин.
Изоҳ (0)