Самарқанддаги тиббиёт муассасалари 9,2 миллиард сўмлик дори воситаларига муқобил тижорат таклифлари мавжуд бўлгани ҳолда, 14 миллиард 902 миллион сўмга, яъни 5 миллиард 643 миллион сўм қиммат нархларда харид қилингани аниқланди. Бу ҳақда Коррупцияга қарши курашиш агентлиги маълум қилди.
Қайд этилишича, ушбу ҳолат агентликнинг Самарқанд вилоят соғлиқни сақлаш бошқармаси ва унинг қуйи тизимларида «Коррупциясиз соҳа» лойиҳаси доирасида бюджет маблағлари, давлат активларини реализация қилиш ва давлат харидлари соҳасида қонун ҳужжатларига риоя этилиши ҳолати бўйича ўтказилган ўрганишда аниқланган.
Ўрганишда 4,9 миллиард сўмлик тендер ва 186,1 миллион сўмлик электрон дўкон шаклидаги харидлар қонун талабларига зид равишда ташкил қилингани ҳам маълум бўлган.
Ушбу ҳолатлар юзасидан Самарқанд вилоят прокуратураси томонидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан 2 та жиноят иши қўзғатилган.
Эслатиб ўтамиз, 2 июль куни «Давлат харидлари шаффофлигини таъминлаш ва самарадорлигини оширишга доир қўшимча чора-тадбирлар тўғрисида»ги Президент қарори қабул қилинди. Қарор билан Давлат харидлари очиқ ва шаффоф амалга оширилишини таъминлаш бўйича республика комиссияси тўғрисидаги низом тасдиқланган.
Шу билан бирга, давлат харидларини амалга ошириш жараёнлари алоҳида тартибда назорат қилинадиган айрим корпоратив ва бюджет буюртмачилари рўйхати ҳам тузилган. Ушбу рўйхатда Соғлиқни сақлаш вазирлиги ҳам ўрин олган.
Изоҳ (0)