Qashqadaryo viloyati rahbari Zoir Mirzayev viloyatning Qamashi tumanidagi sayyor qabulda Afg‘oniston voqealari haqida gapirdi. Bu haqda “Daryo”ga Zoir Mirzayevning matbuot kotibi Ahror Sodiqov ma’lum qildi.
Qayd etilishicha, viloyat hokimi 22-avgust, yakshanba kuni Qamashi tumanining Azlartepa qishlog‘ida bo‘lib, qishloq aholisini qiynab kelayotgan muammoni o‘rgangan.
“Afg‘onistonda odamlar samolyotning qanotlariga yopishyapti, qanday bo‘lmasin mamlakatdan chiqib ketishni maqsad qilishgan. Bugun ham 400 nafar qochqin chegaradan o‘tib, Surxondaryoda palatka tikib, boqilyapti. Toshkentda qancha odam, butun davlatning vakillariga hurmatli Prezidentimiz joy berib, uch-to‘rt kundan keyin mamlakatiga qaytarib yuboryapti. Bu ham odamgarchilikning namunasi”, — dedi viloyat rahbari Afg‘oniston voqealari haqida gapirar ekan.
Zoir Mirzayev qishloq fuqarolari bilan muloqot qilar ekan, vatan tinchligiga shukrona qilish lozimligini ta’kidlaydi.
“Bolangiz kechasi soat ikkigacha, uchgacha ko‘chada yuradi. Ba’zan ertalab qaytadi. Xayolingizda yo‘q, maza qilib uxlaysiz. Chunki yurt tinchligidan ko‘nglingiz xotirjam, chegaraning egasi borligiga ishonasiz. Ertaga Xudo ko‘rsatmasin, biror gap bo‘lsa, sichqonning ini ming tanga bo‘lib ketadi. ‘Mana, qo‘lingga qurolni ol-da, Afg‘oniston chegarasini ikki soat qo‘riqla’, deyishdan, ‘uyingdan topganingni ber, chegarachining ovqatini ko‘tar’, deyishlikdan, ‘harbiylar ovqatini to‘lab ber’, deb xalqqa soliq solishdan Xudoning o‘zi asrasin”, — degan viloyat rahbari aholiga yuzlanar ekan.
Zoir Mirzayev aholi tomonidan ko‘tarilayotgan ba’zi muammolar to‘qlikka sho‘xlik ekanini aytgan.
“Biz va siz muhokama qilayotgan muammolarning ba’zilari to‘g‘ri muammo, ammo to‘qlikka sho‘xlik sifatida aytilayotgan muammolar ham bor”, — deydi viloyat hokimi.
Ahror Sodiqovning aniqlashtirishicha, Zoir Mirzayev Qamashi tumanining Azlartepa qishlog‘ida aholining yer bilan bog‘liq muammosini hal etish uchun borgan.
“Shu qishloqda yashovchi 450 ta xonadon vakillarining o‘zboshimchalik bilan qurib olgan uy-joyi Chiroqchi tumani hududi hisoblanadi. Shu sabab hech qaysi xonadonning kadastr hujjati yo‘q. Biroq muammo yechilishi kerak. Viloyat rahbari senator sifatida Senatga taklif kiritib, azlartepaliklar duch kelgan muammo yechimi bo‘yicha fikr bildirishini va muammo aholi foydasiga hal qilinishini bildirdi”, — deydi Ahror Sodiqov.
Eslatib o‘tamiz, avvalroq Afg‘onistonda etnik o‘zbeklar va tojiklar “Tolibon”ga qarshi koalitsiya tuzayotgani haqida xabar berilgandi.
Izoh (0)