Ўзбекистон олтин экспортини яна тўхтатди

Ўзбекистон олтин сотиб олишни яна тўхтатди. Бу ҳақда Давлат статистика қўмитаси маълумотлари гувоҳлик бермоқда.

Spot’нинг қайд этишича, мамлакат йил бошидан буён 1,3 миллиард долларлик олтин экспорт қилди, аммо унинг салмоқли қисми (1,2 миллиард доллар) май ойига тўғри келди. Июнь ойи бошларида Ўзбекистон яна 191 миллион долларга экспорт қилишга улгурди. Июль ойига келиб эса ушбу қимматбаҳо металл экспортини тўхтатди.

Аксар мамлакатларда олтин қазиб олувчилар уни ўзлари экспорт қилади, аммо Ўзбекистонда ягона сотувчи бу Марказий банк ҳисобланади. У олтинни ишлаб чиқарувчилардан сотиб олади (масалан, Навоий кон-металлургия комбинати) ва бошқа мамлакатларга (асосан, Швейцарияга) экспорт қилади.

Марказий банк бошқаруви раисининг ўринбосари Беҳзод Ҳамроев олтин сотиш ушбу металларнинг нархи энг юқори даражага кўтарилса, қайта тикланишини айтганди. Май ойида олтин унцияси 1900 долларга кўтарилди ва Ўзбекистон бундан фойдаланиб олтин сотишни бошлади. Июнь ойида унинг нархи яна туша бошлади ва айни пайтда унцияси 1782 долларни ташкил қилмоқда.

Шундай шароитда Ўзбекистоннинг олтин-валюта захираси 1 август ҳолатига кўра, 35,1 миллиард долларни ташкил этди. Бу июль ойидаги кўрсаткичдан 964 долларга кўп. Бунинг асосий сабаби — олтин. У эндиликда 21,5 миллиард долларга тенг (тахминан 367 тонна бўлиб, аввалги ойдан қарийб 10 тоннага кўп).