Тошкент ва Сирдарё вилоятларида талаб юқори бўлган дори воситаларини қиммат нархда сотишга уринган шахслар қўлга олинди

Талаб юқори дори воситаларини Тошкент вилояти Пискент туманида 23 минг, Сирдарё вилояти Ширин шаҳрида эса 3 минг долларга сотишга уринган шахслар ушланди, деб хабар беради Бош прокуратура ҳузуридаги департамент.

Маълум қилинишича, Бош прокуратура ҳузуридаги департаментнинг Пискент тумани бўлими томонидан тезкор тадбир ўтказилган. Унда Б.Т., R.T. ва Ш.Н. исмли фуқаролар пандемия шароитида талаб юқори бўлган дори воситаларини қиммат нархларда сотиб, даромад орттиришни кўзлагани аниқланган. Хусусан, улар хорижда ишлаб чиқарилган 399 қути «Совифор 100 мг» («Ремдесивир»), 1 820 қути «Стопер 2 мг», 13 қути «Клексан 0.8мл» ва 50 қути «Имудон» дори воситаларини жами 23 минг долларга сотган вақтида ашёвий далиллар билан ушланган.

Экспертиза хулосасига кўра, ушбу дори воситаларининг умумий баҳоси 185,3 миллион сўмни ташкил этган.

Шунингдек, департаментнинг Ширин шаҳар бўлими томонидан ўтказилган тезкор тадбирда Ш.Б. ва Д.Б. исмли фуқаро ўзаро тил бириктириб, 50 қути «Covifor» («Ремдесивир»), 5 қути «Аcтемра 400 мг/20мл» дори воситаларини жами 3 минг АҚШ доллари ва 2,7 миллион сўмга сотган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 186-3-моддаси (дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш) билан жиноят ишлари қўзғатилиб, тергов ҳаракатлари ўтказилмоқда.

Аввалроқ Зангиотада 91,5 миллион сўмлик «Ремдесивир» дори воситасини 12 минг долларга сотишга уринган шахс ушлангани, Андижонда 650 миллион сўмлик сифати кафолатланмаган ва истеъмолга яроқсиз дори воситалари йўқ қилингани тўғрисида хабар берилганди.

Мавзуга доир:

• Тошкентда «Клексан» дори воситасини ноқонуний равишда муомалага киритаётган шахслар ушланди
• Тошкент ва Қашқадарёда пандемия шароитида талаб юқори бўлган дориларни ноқонуний равишда сотаётган шахслар ушланди