Олий Мажлис Сенатида 21 август куни Танзила Норбоева бошчилигида коррупцияга қарши курашиш кенгашининг навбатдаги мажлиси бўлиб ўтди. Бу ҳақда Сенат ахборот хизмати хабар берди.
Йиғилишда коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ҳамда коррупцияга қарши курашиш фаолиятини самарали ташкил этишга оид Ўзбекистон Президентининг 2 та ҳужжати – фармон ва қарори, шунингдек, Коррупцияга қарши курашиш бўйича 2021–2022 йилларга мўлжалланган давлат дастури қабул қилинди.
Мажлисда вазирлик ва идоралар биринчи раҳбарларининг ижро интизоми бўйича шахсий масъулиятини ошириш, Миллий кенгаш мажлиси баённомасида белгиланган вазифаларни тўлиқ адо этишлари юзасидан аниқ топшириқлар берилди.
Бундан ташқари, мактабгача таълим, халқ таълими, маданият, соғлиқни сақлаш, бандлик, транспорт соҳалари ҳамда маҳаллий ижроия ҳокимияти органлари тизимида содир этилган коррупциявий жиноятлар ва уларнинг келиб чиқиш сабаблари таҳлил этилди.
Таъкидланишича, 2021 йилнинг биринчи ярим йиллигида мактабгача таълим тизимининг қурилиш соҳасида 89 та ҳолатда молиявий хато ва камчиликлар аниқланган. 2019–2020 йиллар ва 2021 йилнинг биринчи ярмида 50 та МТТда амалга оширилган капитал таъмирлаш ишларида бюджет маблағлари талон-торож қилинган.
Олий таълим тизимида ўтказилган ўрганишда 2 та олийгоҳда бухгалтерия хизматининг ходимлари томонидан маблағлар ноқонуний ўзлаштирилгани аниқланган.
Мажлисда молиявий интизомни кучайтириш ва бюджет даромадларини оширишга қаратилган муҳим вазифалар белгилаб олинди.
Бундан аввал Сергелида 32,5 минг долларни ўзлаштириб юборган банк кассири ва бош мутахассисига жиноят иши қўзғатилгани, Фарғонада омбор мудири аҳоли ва давлат ташкилотларига тарқатилиши керак бўлган 852 минг тонна кўмирни сотиб юборгани аниқлангани ҳамда Самарқанддаги давлат муассасаларида 563 миллион сўм бюджет маблағлари талон-торож қилингани аниқлангани ҳақида хабар берилганди.
Изоҳ (0)