Ўзбекистонда ишлаб чиқарилган ўзбек-хитой ва «Спутник V» вакциналари давлат рўйхатидан ўтказилади

Ўзбекистон ҳукумати Jurabek Laboratories компаниясида ишлаб чиқарилган ZF-UZ-VAC2001 ва «Спутник V» вакциналарини давлат рўйхатидан ўтказишга розилик берди, дея хабар қилмоқда «Gazeta.uz».

Маълум қилинишича, бош вазир Абдулла Арипов 20 август куни Вазирлар Маҳкамасининг «Ўзбекистон Республикасида коронавирус инфекцияси билан боғлиқ эпидемиологик вазият барқарорлигини таъминлаш бўйича қўшимча чора-тадбирлар тўғрисида»ги қарорига имзо чекди.

Ҳужжатда Jurabek Laboratories компанияси Anhui Zhifei Longcom Biopharmaceutical Хитой компанияси билан ZF-UZ-VAC2001 вакцинасини Ўзбекистонда ишлаб чиқариш бўйича келишувга эришгани қайд этилган. Дастлабки босқичда хитойлик ҳамкорлар вакцина субстанциясини етказиб бериш масаласини кўриб чиқаётгани айтилган.

Бундан ташқари, Jurabek Laboratories Россия компанияси билан «Спутник V» вакцинасини Ўзбекистонда ишлаб чиқариш бўйича келишувга ҳам эришган. Унинг ҳам дастлабки босқичда субстанцияси Россия томонидан етказиб берилиши маълум қилинган.

Истисно тариқасида ишлаб чиқариш жараёнларига доир техник жиҳатдан тартибга солиш соҳасидаги норматив ҳужжатлар, вакциналарни субстанциялари ва «in bulk» ишлаб чиқарувчиларининг клиник олди ва клиник тадқиқотлари ижобий хулосалари тан олинмоқда.

Шу билан бирга, Фармацевтика тармоғини ривожлантириш агентлигининг «Дори воситалари, тиббий буюмлар ва тиббий техника экспертизаси ва стандартлаштириш давлат маркази» ДУКга компания томонидан ишлаб чиқариладиган вакциналарнинг лаборатория синовлари ва рўйхатдан ўтказиш ҳужжатлари экспертизаси беш иш кунида амалга оширишни таъминлаш вазифаси юклатилмоқда.

Бундан аввал Ўзбекистонда биринчи босқичда 2 миллион доза «Спутник V» ва 10 миллион доза ўзбек–хитой вакцинаси ишлаб чиқарилиши ҳамда Ўзбекистонда «Спутник V» вакцинасининг биринчи партияси ишлаб чиқарилгани ҳақида хабар берилганди.