Беларусда гармалин ва гармин (исириқ) хавфли психотроп моддалар қаторига киритилди. Бу ҳақда Беларуснинг Ўзбекистондаги элчихонаси матбуот хизмати мамлакат божхона органлари маълумотларига асосланиб хабар берди.
Таркибида юқоридаги моддалар бор ўсимликлар Беларусда давлат назоратига олинадиган гиёҳвандлик воситалари, психотроп моддалар ҳамда прекурсорларнинг республика рўйхатига киритилган ва тиббий мақсадларда ишлатилмайди.
Шу муносабат билан, элчихонада қайд этилганидек, ушбу моддалар ва уларни ўз ичига олган ўсимликларни Беларусь ҳудудига олиб кириш мамлакат Жиноят кодексининг 328-моддасига (гиёҳвандлик воситалари, психотроп моддалар, уларнинг прекурсорлари ва аналогларининг ноқонуний айланмаси) мувофиқ жиноий жавобгарликка олиб келиши мумкин.
«Беларусь қонунчилиги бузилмаслиги учун республика божхона органлари мамлакатга кираётган фуқаролардан ўзлари билан ўта хавфли психотроп моддалар бўлган ўсимликларни олиб келмасликни сўрайди», – дейилади хабарда.
Шунингдек, элчихона хабарида Беларусда тамаки (тозаланган тамаки кукуни) ҳамда ишқорий компонентлардан (бўр, оҳак ёки бошқа ишқорий моддалар) сўриш ва чайнаш учун мўлжалланган (снус, носвой ва бошқалар) тутунсиз тамаки маҳсулотларини ишлаб чиқариш ва муомалага киритиш тақиқлангани эслатиб ўтилган.
Изоҳ (0)