Россияда 1992 йилда ишлаб чиқарилган ва ҳозирга қадар 255 километр йўл босган оқ «ЗАЗ-968М» 1,2 миллион рубль (16,1 минг доллар) қийматида сотувга қўйилди, деб хабар беради Motor.
«ЗАЗ-968М» модели конвейердан 1979 йилда чиққан. Машҳур «Запорожец»нинг сўнгги янгиланишига айланган модель модификациясидан келиб чиқиб, 41-45 от кучини тақдим этишга қодир 1,2 литрли мотор билан жиҳозланган. Сотувга қўйилган машина ўзидан олдинги «ЗАЗ-968А» версиядан тўғри бурчакли орқа фаралари ва бурилиш чироқлари, шунингдек, кенг сиғимли юкхонаси билан ажралиб туради.
Сотувга қўйилган нусха идеал ҳолатда. Сотувчининг сўзларига кўра, машинанинг барча техник узеллари соз ҳолатда. 30 йил давомида «Запорожец» 255 километр йўл босган. Қолган вақт эса сотувчининг бобосининг гаражида ҳаракатсиз сақланган.
Машина эгаси ушбу «Запорожец»ни 1,2 миллион рублга сотишга тайёр. Бу пулга Россияда базавий жамланмадаги янги Hyundai Creta’ни харид қилиш мумкин.
Аввалроқ Польшада 34 йиллик «Запорожец» янги Tracker нархида сотувга қўйилгани, интернетда машҳур «Запорожец»нинг футуристик дизайнга эга замонавий тасвирлари пайдо бўлгани тўғрисида хабар берилганди.
Мавзуга доир:
Изоҳ (0)