Rolls-Royce компанияси Гудвуддаги корхонада кўчиб келган янги «меҳмонлар» ҳақида маълумот берди, деб ёзади Motor.
Корхона ҳудудида Rolls-Royce ходимлари қутқариб қолган 15 та ўрдак яшамоқда. Ҳозирда мазкур «оила» ўзларини ветеринария клиникасига элтган Cullinan йўлтанламаси қулайлигини баҳолашга улгурган.
2021 йилнинг апрелида автозаводнинг қўриқлаш хизмати ходими Жеймс Каффри корхона автотураргоҳида онасини йўқотиб қўйган еттита ўрдакни топиб олган. Компания мутахассислари бир неча соат давомида ўрдакчаларни кузатиб, уларни қутқариш бўйича қарор қабул қилган. Ўрдаклар эҳтиётлик билан қўлга олинган ва энг яқин ветеринария клиникасига олиб борилган — у ерда паррандалар мутахассис назорати остида улғайишган.
Ветеринарлар билан маслаҳатлашган Rolls-Royce ходимлари ўрдакларни заводнинг кўлига қўйиб юборишга қарор қилган. Шу билан бирга, уларни янги уйида кейинроқ қутқариб олинган саккизда ўрдак кутаётган бўлган. Ветеринария клиникасидан автозавод ҳудудига қадар ўрдаклар Cullinan йўлтанламасида олиб келинган. Шу муносабат билан мутахассислар келажакда моделнинг 560 литрли юкхонасини ўрдаклар ёрдамида ўлчашни таклиф этмоқда.
Аввалроқ интернетда Лонг Бой лақабли улкан ўрдакнинг сурати вирус каби тарқалгани, Ёрк университети кампусида яшайдиган қуш ижтимоий рекламаларда суратга тушаётгани тўғрисида хабар берилганди.
Изоҳ (0)