Самарқанд вилоятининг Ургут туманида безорилик содир қилган 8 нафар шахс қамоққа олинди, деб хабар бермоқда вилоят ИИБ матбуот хизмати.
Маълум қилинишича, 28 июль куни Ургут тумани «Пастки Қайроқли» маҳалласида яшовчи М.М., Damas’да ўзининг танишлари билан, «Камангарон» маҳалласига яшовчи таниши Т.А. ни уйидан олиб, «Ургут истироҳат боғи»га айланиш учун кетаётганида, шу маҳаллада яшовчи бир неча фуқаролар уларни кўриб қолиб, автомашинасини қисиб тўхтатга, сўнг уларни сабабсиз уриб, тан жароҳатлари етказган.
Туман ИИБ навбатчилик қисмига келиб тушан хабарга асосан, воқеа жойига ИИБ ходимлари зудлик билан етиб бориб, фуқароларни тинчлантираётган вақтида, бир гуруҳ фуқаролар ИИБ ходимларининг қонуний талабларига бўйсунмасдан, уларга қаршилик кўрсатган.
Ҳолат юзасидан Ургут тумани ИИБ ҳузуридаги Тергов бўлими томонидан Жиноят кодексининг 277-моддаси 3-қисми «г» банди билан (жамоат тартибини сақлаш вазифасини бажариб турган ҳокимият вакилига қаршилик кўрсатиб содир этилган безорилик) жиноят иши қўзғатилиб, гумонланувчилар процессуал тартибда ушланган. Ҳозирда дастлабки тергов ҳаракатлари ўтказилмоқда.
Изоҳ (0)