Наманганда Мустақиллик байрами арафасида тўртта тиббий муассаса мукаммал таъмирланиб, фойдаланишга топширилди. Бу ҳақда «Дарё» мухбири Азизбек Абдувалиев хабар бермоқда.
Республика шошилинч тиббий ёрдам илмий марказининг Наманган филиали бундан 22 йил аввал вилоят кўп тармоқли шифохонаси негизида ташкил этилган эди. Вақтлар ўтиб, бу ердаги бино ва иншоотлар, жиҳоз ва қурилмалар эскирди.
Филиални бугунги кун талаблари асосида реконструкция қилиш ва қайта қуришга 46 миллиард сўм сарфланди. 350 ўринли даволаш бўлимлари таъмирдан чиқарилди, муҳандислик тармоқлари янгиланди. Даволанувчилар ва тиббиёт ходимлари учун қулай, шинам шароитлар яратилди.
Аҳолига кўрсатилаётган тиббий хизмат сифатини ошириш учун малакали кадрлар ва замонавий тиббий асбоб-ускуналар талаб этилади. Республика шошилинч тиббий ёрдам илмий маркази директори, тиббиёт фанлари доктори Бахтиёр Тўлагановга кўра, Наманган филиалига яқин орада 3,8 миллион долларлик янги асбоб-ускуна ва тиббиёт аппаратуралари етказиб берилади.
Республика шошилинч тиббий ёрдам илмий марказининг Наманган филиалига қўшни жойлашган 300 ўринли шаҳар болалар шифохонаси биноси ҳам таъмирталаб бўлиб қолган, бу ердаги қониқарсиз шарт-шароитлар туфайли эътирозлар кўп эди.
Қурувчилар меҳнати туфайли тиббиёт маскани кўркам қиёфага кирди. Биноларга жазирамада салқин, қаҳратон пайти илиқ тутувчи қопламалар ўрнатилди. Реанимация ва операция хоналарида узлуксиз мўътадил ҳарорат яратилди, «тоза ҳудуд» вужудга келтирилди. Бунинг учун давлат бюджетидан 34 миллиард сўм ажратилди.
Тиббий текширув ва муолажа аппаратлари янгиланди. Шифохонани энг замонавий тиббий техника воситалари билан жиҳозлаш мақсадида 1,5 миллиард сўмлик асбоб-ускуналар келтирилди.
Инвестиция дастурига мувофиқ, Наманган шаҳар туғруқ мажмуаси ҳам қайта таъмирланди ва реконструкция қилинди.
Шунингдек, қўшимча бинолар барпо этилди. Бу мақсадлар учун 28 миллиард сўм маблағ йўналтирилди.
Шаҳарнинг Янги Наманган туманида эса 2-туғруқ мажмуаси фойдаланишга топширилди. Собиқ травматология шифохонаси ўрнида шинам ва замонавий туғруқ комплекси қад ростлади.
Иншоот нафақат таъмирланди, балки ёнида қўшимча 5 қаватли бино ҳам қурилди. Иситиш ва совутиш тармоқлари бугунги технологиялар асосида такомиллаштирилди.
Бу ишлар учун 15 миллиард сўм сарфланди. Муассасани энг замонавий тиббиёт асбоб-ускуналари билан жиҳозлаш учун яна 4 миллиард сўм ажратилиши кўзда тутилган.
Тиббиёт муассасаларини фойдаланишга топшириш маросимларида вилоят ҳокими Шавкат Абдураззоқов иштирок этди.
Маълумот учун, Наманганда инвестиция дастурига асосан 2021 йил 8 та даволаш-профилактика муассасасида 70 миллиард сўмлик янги қурилиш, реконструкция ва мукаммал таъмирлаш ишларини амалга ошириш кўзда тутилган.
Шунингдек, «Обод қишлоқ» ва «Обод маҳалла» дастурлари доирасида ҳам ўнлаб тиббиёт муассасалари бинолари таъмирдан чиқарилмоқда.
Изоҳ (0)