Чирчиқ дарёсида қизил рангдаги сув оқизилаётгани ҳақида хабар берилганди. Тошкент вилояти ҳокимлиги ушбу хабар юзасидан маълумот берди.
Маълум қилинишича, рангли сув Чирчиқ оқова сувларни тозалаш иншоотидан дарёга оқизилган. Ушбу рангли сув тозалаш иншоотига қаердан келиб қолгани ўрганилди.
Чирчиқ дарёсида юзага келган ҳолатга ойдинлик киритиш мақсадида Тошкент вилояти ҳокимининг ўринбосари Б.Мелиев, «Тошкент сув таъминоти» МЧЖ директори И.Талипов, марказий лаборатория мудираси Ж.Миртурсунова жойига чиқиб ўрганди. Чирчиқ оқова сувларни тозалаш иншоотида тозаланган сувдан намуна олиб текширилганда, дарёга чиқарилган оқова таркибидаги ранг текстиль корхоналарида фойдаланиладиган бўёқ эканлиги маълум бўлди.
Маълумотларга кўра, Бўстонлиқ ва Қибрай туманлари оқова сувларининг маълум бир қисмини Чирчиқ оқова сув иншооти қабул қилади. Суткасига 80 минг куб оқова сувни қабул қилувчи ушбу иншоотга «Узтех Чирчиқ», «Алким текстиль», «Орзу-текс», Indigo garments, Osborn textile каби енгил саноат корхоналаридан ҳам меъёридан ортиқ ифлослантирувчи моддалар аралашган ва айрим ҳолатларда рангли оқова сувлар чиқарилгани аниқланган.
Шу тариқа белгиланган техник ва технологик талабларга амал қилмаслик натижасида юқоридаги каби салбий вазиятлар юзага келмоқда.
Келгусида бундай ҳолатларга йўл қўймаслик бўйича барча енгил саноат корхоналари мутасаддилари қатъий огоҳлантирилди.
Шу билан бирга, Чирчиқ дарёсида юзага келган ҳолат бўйича қўшимча ўрганиш ишлари бошланди. Мазкур мавзу юзасидан суриштирувлар якунлангач, натижа ва хулосалар эълон қилиниши маълум қилинди.
Изоҳ (0)