Афғонистонлик қочоқлар ўзбек—афғон чегарасидан ўтган Амударёни баклашкалардан ясалган солларда кесиб ўтмоқда. Бу ҳақда «ТАСС» нашри Термиздаги манбасига таяниб хабар берди.
Маълум қилинишича, сўнгги кунларда бир неча гуруҳ афғон қочоқлари ноқонуний равишда Ўзбекистон ҳудудига ўтган, шу билан бирга, мутахассислар формадаги қуролланган одамлар Амударёдан сузиб ўтганига ҳайрон. «Аниқланишича, афғонлар оқими тез бўлган етарлича чуқур дарёдан сузиб ўтишда сув учун мўлжалланган ва етарлича юк кўтаришга қодир бўш баклашкалардан ясалган соллардан фойдаланмоқда», — дейди манба.
Унинг қўшимча қилишича, бу каби арзон, самарали, енгил, овоз чиқармайдиган ва ишончли сузиш воситасини бошқариш осон. «Саноқли дақиқаларда дарёни сузиб ўтган қонунбузарларнинг барачаси чегарачиларимизга таслим бўлган», — дея таъкидлайди манба.
Аввалроқ Сурхондарё вилояти Мудофаа ишлари бошқармаси вакили «Дарё» мухбири билан суҳбатда Шерободга Афғонистон самолёти қулаганини қисман тасдиқлаганди. «Кўзим билан кўрганим йўқ, аммо самолёт бор дейишди», — дейди бошқарма вакили.
Кейинроқ Бош прокуратура Афғонистоннинг 22 та ҳарбий самолёти ва 24 та ҳарбий вертолёти 14—15 август кунлари Ўзбекистон ҳаво ҳудуди чегарасидан ноқонуний ўтганини маълум қилди. Идоранинг таъкидлашича, барча самолётлар Термиз халқаро аэропортига мажбурий қўндирилган, уларнинг бортида жами 585 нафар афғонистонлик қуролланган ҳарбий хизматчилар бўлган.
Изоҳ (0)