Қарши шаҳрида содир бўлган мудҳиш жиноят — чемпион йигитнинг ўлимида 8 нафар кишининг қўли борлиги, уларнинг орасида мактаб ўқувчилари ҳам борлиги маълум қилинди, дея хабар берди «Дарё» мухбири.
Қайд этилишича, бу ҳақда вилоят прокуратурасида Ўзбекистон Бош прокурори Ниғматилла Йўлдошев, ички ишлар вазири Пўлат Бобожонов ҳамда Олий суд раиси Козимжон Комилов иштирокидаги матбуот анжуманида маълум қилинган.
«Жиноят иштирокчилари 8 нафар бўлган. Уларнинг 7 нафари шу куни — 17 август куни қўлга олинган бўлса, жиноятнинг асосий гумонланувчиси Зуҳриддин Боймирзаев 18 август куни Чироқчи туманида яшириниб ётган жойидан ушланган», — дейди ички ишлар вазири Пўлат Бобожонов.
Ички ишлар вазирининг маълумот беришича, жиноятда гумонланаётганларнинг икки нафари мактабнинг 11-синф ўқувчиси бўлган.
«Жиноятда асосий гумонланувчи бўлган фуқаронинг отаси укасининг хотинини ўлдириб, 14 йил қамоқ жазосини олган», — дейди вазир Пўлат Бобожонов.
Эслатиб ўтамиз, 2021 йилнинг 17 август куни Қаршида чемпион йигит ўлдирилгани хабар берилганди. Бош прокуратура ахборот хизмати мазкур воқеага муносабат билдириб, ҳолат бўйича Жиноят кодексининг 97-моддаси (қасддан одам ўлдириш) билан жиноят иши қўзғатилганини, гумонланувчи сифатида терговга жалб қилинган 7 нафар кишининг 6 нафари қамоққа олингани маълум қилганди. Чемпион йигитнинг дўппосланишига гувоҳ бўлганлар воқеа ҳақида 102 қисқа рақамларига қўнғироқ қилиб хабар берилганига қарамасдан ИИБ ходимлари воқеа жойига жуда кеч етиб келганини айтганди.
Изоҳ (0)