«Толибон» ҳаракатининг расмий вакили Забиҳулла Мужоҳид Афғонистонда аёллар ҳуқуқларига шариат қонунлари асосида риоя қилинишига ваъда берди. Бундан ташқари, Al Arabiya телеканали ҳаракат вакилларига таяниб хабар беришича, «Толибон» мактабларда ўғил ва қиз болалар учун алоҳида-алоҳида синфлар жорий этади.
Афғонистонда «Толибон» ҳукмронлик қилган аввалги даврда (1996–2001) аёллар ҳуқуқлари сезиларли даражада чекланган эди. Уларга пардоздан фойдаланиш, жамоат жойларида юзларини очиб юриш, радио, телевизорга чиқиш, шунингдек, эркак қариндошларисиз бирор жойга бориш тақиқланган эди. Аёлларга ташкилотларда ишлаш тақиқланган, чунки «Толибон»нинг ўша пайтдаги фикрига кўра, «аёл иш вақтида эркак ҳамкасби билан жинсий алоқа қилиши мумкин».
«Аёллар шариат доирасида яшайди. Қўшни давлатлар ва жаҳон мамлакатлари биз аёлларнинг ҳуқуқларини тан олмаймиз деган хаёлга бормаслиги керак. Биз мусулмонмиз, аёлларимиз ҳам мусулмон», — деди Забиҳулла Мужоҳид матбуот анжуманида.
Унинг қўшимча қилишича, «ҳамма мамлакатларнинг ўз қонунлари бор. Афғонистоннинг ҳам ўз урф-одатлари ва анъаналари бор». «Биз ўз урф-одатларимизни ҳурмат қиламиз. Бизнинг тинч ҳуқуқимиз — мамлакатимизда ислом қонунларини жорий этишдир», — деди ҳаракати вакили.
Аввалроқ «Толибон» «аёллар ҳуқуқларини ҳурмат қилишини» ва агар паранжи кийса, уларга ишлаши ва ўқиши учун рухсат беришни ваъда қилганди. БМТ Хавфсизлик кенгаши янги Афғонистон ҳукуматини аёллар иштирокида тузишга чақирган.
«Толибон» вакили Энамулла Саманганий Афғонистон давлат телевидениесидаги чиқишида аёлларни мамлакат раҳбариятига жалб этиш эҳтимолини истисно қилмади.
«Ислом Амирлиги (‘Толибон’ Афғонистонни шундай атайди) аёлларнинг қурбон бўлишини хоҳламайди, шариат қонунларига кўра, аёллар давлат тузилмаларининг бир қисми бўлиши керак», — деди у. Шу билан бирга, Саманганий ҳукумат тузилмаси ҳали тўлиқ маълум эмаслигини таъкидлади. Унга кўра, Афғонистоннинг янги ҳукумати тажрибага асосланган бўлади, лекин у бутунлай исломий раҳбарият бўлади.
«Толибон»нинг Қатардаги ваколатхонаси вакили Суҳайил Шоҳиннинг BBC’га айтишича, аёллар ўқишни давом эттириши ва нормал ҳаёт кечириши мумкин бўлади, лекин уларга қонун ижодкорлиги ва суд фаолиятида қатнашишга рухсат берилиши ёки берилмаслиги номаълум.
BBC хабарига кўра, «Толибон»нинг ваъдалари Афғонистоннинг турли ҳудудларидан келаётган хабарларга зид. Масалан, Қандаҳорда банкда ишлайдиган аёлларга энди уларнинг ишларини эркак қариндошлари бажариши айтилган. Бошқа ҳудудларда аёлларга мустақил равишда кўчага чиқишга рухсат берилмаяпти ва улар паранжи ёпинишга мажбур бўлмоқда.
Мавзуга доир:
Изоҳ (0)