Шавкат Мирзиёев Россия президенти Владимир Путин билан 15 август куни телефон орқали мулоқот қилиб, Афғонистонда юзага келаётган вазият бўйича фикр алмашди.
Россия президенти матбуот хизматининг маълум қилишича, суҳбатда Афғонистондаги вазиятнинг ривожланиши атрофлича муҳокама қилинди. Шуни ҳисобга олган ҳолда, Россия ва Ўзбекистоннинг тегишли вазирлик ва идоралари ўртасида ўзаро ҳамкорликни фаоллаштиришга келишиб олинди. Давлат раҳбарлари бундан кейин ҳам ўзаро мунтазам алоқаларни давом эттиради.
Ўзбекистон Президенти матбуот хизматининг қайд этишича, минтақавий хавфсизлик ва барқарорликни таъминлаш борасида икки мамлакатнинг тегишли идоралари ўртасида яқин алоқалар ва ҳамкорликни давом эттириш юзасидан келишувга эришилди.
Суҳбатда Ўзбекистон ва Россия ўртасидаги стратегик шериклик ва иттифоқчилик муносабатларини янада ривожлантириш ҳамда кўп қиррали ҳамкорликни кенгайтириш масалалари ҳам кўриб чиқилди.
Президентлар 5 июль куни бўлиб ўтган телефон орқали мулоқотда ҳам Афғонистондаги аҳвол ёмонлашиши муносабати билан Марказий Осиёдаги вазиятнинг ривожига алоҳида тўхталиб ўтиб, Ўзбекистон ва Россиянинг ваколатли идора ва ташкилотлари ўртасидаги мунтазам мулоқотлар ва яқин ҳамкорликни давом эттиришга келишиб олганди.
Эслатиб ўтамиз, 14 август куни Афғонистон шимолидаги Мозори-Шариф шаҳри (Термиздан 58 километр жанубда жойлашган) «Толибон» қўлига ўтгани маълум бўлганди. Шаҳар топширилгач, Афғонистон мудофаа ва хавфсизлик кучлари Ўзбекистон билан чегара томон чекинди, 15 августга ўтар кечаси Ҳайратон ва Термиз оралиғидаги кўприкда юзлаб афғонистонликлар тўпланди.
15 август тонгида эса Ўзбекистон томони Афғонистон Қуролли Кучларининг ҳарбий хизматчиларидан иборат 84 кишилик гуруҳни қабул қилгани (улар орасида уч нафар ярадор ҳам бўлган), улар ДХХ Чегара қўшинлари томонидан қўлга олиниб, Ўзбекистон ҳудудида вақтинча бўлиб туриши ташкил этилгани маълум бўлди. Соат 10:00 га келиб, ушбу кўприкдаги вазият юмшади. Афғонистонликларнинг асосий қисми кўприкни тарк этди. Пешинга яқин эса Ҳайратон кўприги атрофидаги вазият бутунлай барқарорлашди.
Шу куни «Толибон» ҳаракати Афғонистон ҳудудини тўлиқ ўз назорати остига олганини эълон қилди. Ҳаракат Афғонистонни тарк этмоқчи бўлган барча чет элликлар Кобул аэропорти орқали мамлакатдан тўсиқсиз чиқиб кетишига ваъда бермоқда. Қолиш истагида бўлганлар эса ҳаракат вакилларига учрашиб, рўйхатдан ўтиши керак. Бундан ташқари, ҳаракат жамоатчилик орасида ўзбошимчалик билан жазолаш ҳолатларига йўл қўймасликни режалаштирмоқда. Шунингдек, Афғонистон ҳудудидан бошқа давлатларга қарши ҳаракатлар олиб боришига йўл қўймаслигига ишонтирмоқда.Ўзбекистон расмийларининг маълум қилишича, Ўзбекистоннинг Кобулдаги элчихонаси ва Мозори-Шарифаги консуллиги фаолиятини давом эттирмоқда ва ходимлар ҳали эвакуация қилингани йўқ.
Афғонистон президенти Ашраф Ғани эса истеъфо бериб, Тожикистонга учиб кетгани айтилмоқда.
Изоҳ (0)