Ўзбекистон мусулмонлари идораси раиси, муфтий Усмонхон Алимов 71 ёшида вафот этгани ҳақида хабар берилган эди. Идора матбуот хизматининг маълум қилишича, жаноза намози ва таъзия маросимлари 16 август куни Самарқанд вилояти Иштихон тумани Орлот қишлоғи «Эшони Темирхон Тўра» (аввалги «Орлот» масжиди) жоме масжидида бўлиб ўтади.
Эслатиб ўтамиз, муфтий сўнгги вақтларда Москвада даволанаётган эди — у ўпка ва қон-томир касалликлари, хусусан, ўпка пневмонияси бўйича муолажалар олаётган эди.
Усмонхон Алимов Самарқанд вилояти Иштихон туманида таваллуд топган. 1982—1983 йилларда Бухоро шаҳридаги Мир Араб мадрасасида, 1983—1987 йилларда Имом Бухорий номидаги Тошкент ислом институтида, 1989—1990 йилларда эса Марокашнинг «Каравийн» дорилфунунида таҳсил олган.
Усмонхон Алимов Пайариқ туманида жойлашган Имом Бухорий номидаги жоме масжидида 1980—1982 йилларда имом-ноиб, 1987—1989 йилларда, сўнгра яна 1990—2006 йиллар мобайнида ушбу масжиднинг имом-хатиби сифатида фаолият юритган.
2000—2006 йилларда Ўзбекистон мусулмонлари идорасининг Самарқанд вилояти вакили, бош имом-хатиби сифатида ишлаган. 2006 йилдан то ҳозирга қадар Ўзбекистон мусулмонлари идораси раиси, муфтий лавозимида ишлаб келаётган эди.
Муфтий Усмонхон Алимов 2021 йилда дунёнинг энг нуфузли мусулмонлари рўйхатидан ўрин олган.
Изоҳ (0)