Олий Мажлис Қонунчилик палатаси спикери ўринбосари, президентликка номзод Алишер Қодиров Афғонистондаги вазият бўйича муносабат билдириб, бошпана сўраган афғонистонлик қочқинлар бўйича инсонпарварлик тамойилларига мос ҳаракат қилиниши лозимлигини айтди.
«Афғонистондаги вазият режалаштирилганидек кескинлашди. Қочқинлар ва бошпана сўраганлар бўйича халқаро ҳуқуқ талаблари доирасида, инсонпарварлик тамойилларига мос ҳаракат қилиниши лозим. Афғонистон халқи, жумладан, шимолдаги миллатдошларимизга Афғонистон янги бошқарувининг муносабатига жаҳон ҳамжамияти билан бир тўлқинда баҳо бериб борилиши зарур. Афғонистоннинг янги бошқарувига афғонистонликларнинг муносабати қандай бўлишини эса вақт кўрсатади. Барқарор ва ҳамкор Афғонистон минтақа тақдирида ижобий бурилиш нуқтаси бўлиши тарафдоримиз», — деб ёзган у Telegram каналида.
Эсалтиб ўтамиз, 14 август куни Афғонистон шимолидаги Мозори-Шариф шаҳри (Термиздан 58 километр жанубда жойлашган) «Толибон» қўлига ўтгани маълум бўлганди. Шаҳар топширилгач, Афғонистон мудофаа ва хавфсизлик кучлари Ўзбекистон билан чегара томон чекинган, 15 августга ўтар кечаси Ҳайратон ва Термиз оралиғидаги кўприкда юзлаб афғонистонликлар тўпланган. Шу куни тушга яқин ушбу кўприкдаги вазият барқарорлашди. Афғонистонликларнинг асосий қисми кўприкни тарк этди.
Изоҳ (0)