Афғонистондаги АҚШ элчихонаси ходимларининг кўпчилик қисми яқин 36 соат ичида бошқа жойга эвакуация қилинади. Бу ҳақда CBS телеканали хабар қилган. Кейинчалик Reuters агентлиги эвакуация жараёни бошлангани ва элчихона ходимларининг бир қисми хавфсиз жойга кўчирилаётганини билдирган.
«АҚШнинг Кобулдаги элчихонасининг асосий ходимларидан иборат гуруҳдан бошқа барчаси кейинги 36 соат ичида хавфсиз жойга эвакуация қилади. Американинг Афғонистондаги барча дипломатлари 31 августгача мамлакатни тўлиқ тарк этади», — дейилади хабарда.
Телеканал ахборотига кўра, элчихонада Дипломатик хавфсизлик хизмати бюросининг махсус агентлари ва элчи шаҳарда қолади.
«Элчихонанинг қолган хизматчилари, шунингдек, махсус иммиграция визасини кутаётганлар, маҳаллий ходимлар ва уларнинг оилалари Кобул халқаро аэропортига етказилади», — дейилган маълумотда.
«Толибон» ҳаракати АҚШ ва унинг иттифоқчилари Афғонистон ҳудудидан ўз қўшинларини олиб чиқиб кетишни бошлаганидан кейин фаоллашган. Июль бошида АҚШ ҳарбий қўшинларининг 90 фоизи Афғонистондан чиқиб кетган. Август охирида АҚШ қўшинлари мамлакатдан чиқиб кетишни тўлиқ якунлайди. 12 август куни «Толибон» вакиллари Афғонистондаги иккинчи катта шаҳар Кандаҳорни эгаллаган. Айни вақтда Афғонистон ҳукумати мамлакатдаги 34 та маъмурий марказдан фақат 9 тасини, жумладан, 4 миллион аҳоли яшайдиган пойтахт – Кобулни ўз ихтиёрида ушлаб турибди.
Мавзуга доир:
«Толибон» ҳаракатининг мамлакатда фаоллашгани туфайли элчихона ва консулликлар ёпила бошлаган. Норвегия ва Дания элчихоналарининг фаолияти тўхтаган, Германия эса дипломатик миссияси ходимларининг сонини минимал даражада камайтиради. АҚШ ҳукумати элчихона ходимларига мамлакат байроғи, давлат идораларининг логотиплари туширилган ёзишмалар ва махфий ҳужжатлар ҳамда буюмларни йўқ қилишни буюрган.
АҚШ президенти Жо Байден Афғонистон ҳудудига 5 минг ҳарбий юбориб, у ердаги фуқаролар, ҳамкорлар ва америкаликларга ёрдам берган афғонистонликларни хавфсиз эвакуация қилиш ҳақида кўрсатма берган.
Буюк Британиянинг Афғонистондаги элчиси Лори Бристоу шошилинч равишда мамлакатдан эвакуация қилинди. Бу ҳақда The Sunday Telegraph ҳамда The Times нашрлари ўз манбаларига асосланиб хабар тарқатган.
«Буюк Британия ўз элчиси ва ходимларини эвакуация қилади. Қироллик Афғонистондаги элчихонаси фаолиятини моддий таъминлашни тўхтатади», — дейилган нашрларнинг хабарида.
Telegraph ахборотига кўра, дастлаб хавфсизликни таъминлаш мақсадида Афғонистондаги Буюк Британия элчихонаси Кобул аэропорти ҳудудига кўчирилиши тахмин қилинган, бироқ «Толибон» ҳаракатининг кескин фаоллашуви туфайли ушбу эҳтиёт чоралари яна ўзгартирилган. Қайд этилишича, Бирлашган қиролликнинг дипломатик ваколатхонаси ходимларининг сони 500 нафардан деярли ўн баравар қисқарган ва элчи Бристоу ҳам мамлакатдан кетиши ҳақида гап-сўзлар тарқалган.
Буюк Британия мудофаа вазири Бен Уоллес Афғонистондаги вазият юзасидан изоҳ берар экан, «мамлакатдаги фуқаролар уруши билан боғлиқ оғир вазият ва «Толибон» вакилларининг кучайиб бораётгани барча учун оғриқли тажриба» деб таърифлаган. Шунингдек, вазир АҚШ ҳукуматининг Афғонистондан қўшинини олиб чиқиб кетиши ҳақидаги баёнотдан кейин Лондоннинг мамлакатда ёлғиз курашиши қийинлигини таъкидлаганди.
«Толибон» АҚШ ҳамда унинг иттифоқчилари, жумладан, британиялик ҳарбийлар Афғонистондаги ҳарбийларни олиб чиқиб кетишни бошлаганидан кейин ҳужумга ўтган. Июль бошида мамлакатдаги АҚШ ҳарбий контингентининг 90 фоиз қисми Афғонистонни тарк этди. АҚШ ҳарбийларининг Афғонистондан чиқиб кетиши август охирида якунига етади.
Лондон Афғонистондаги дипломатлари ва бошқа ходимларини эвакуация қилиш учун ҳарбий ҳаво кучларини сафарбар қилиши мумкин.
«Бош вазир Буюк Британия фуқароларини мамлакатдан олиб чиқиб кетиш учун ҳарбий техникадан фойдаланилишига розилик берган», — дейилган Буюк Британия Мудофаа вазирлиги баёнотида. Шунингдек, вазирлик операцияни амалга ошириш учун 600 нафар ҳарбий жалб қилиниши ҳақида ҳам маълумот берган.
Изоҳ (0)