«Толибон» ҳаракати Афғонистон ҳудудини тўлиқ ўз назорати остига олганини эълон қилди. Бу ҳақда Al-Arabiya хабар берди.
ОАВда тарқалган хабарларга кўра, президент Ашраф Ғани истеъфога чиққан, ҳокимият «Толибон» ҳаракатига топширилгунга қадар Афғонистоннинг собиқ ички ишлар вазири, Германиядаги собиқ элчиси Али Аҳмад Жалолий муваққат ҳукуматни бошқариб туради.
«Толибон» Афғонистондаги икки марказий шаҳарлар Бамиан ва Каписани ҳам эгаллаган. Аввал АҚШ Афғонистон ҳукуматининг ҳарбийларига топширган Баграм авиабазаси ҳам ҳаракат ихтиёрига ўтган. Баграмдаги, тахминан, 5 минг нафар маҳбус сақланаётган қамоқхона ҳам «Толибон» назоратига ўтган.
Шунингдек, хабарларга кўра, яқин фурсатларда «Толибон» ҳаракатининг Қатардаги сиёсий офиси раҳбари мулла Абдул Ғани Бародар ҳам Кобулга етиб келиши кутилмоқда.
Халқаро экспертларнинг фикрича, Кобулда ҳокимиятнинг «Толибон» ҳаракатига расман тинч йўл билан топширилиши янги ҳукуматнинг халқаро ҳамжамият ва бошқа мамлакатлар томонидан расман тан олинишини осонлаштириши мумкин.
Ашраф Ғани, президент администрациясининг бошқа ходимлари Кобул аэропортида эканлиги, бироқ уларга мамлакатни тарк этишга рухсат берилмаётгани айтилмоқда.
Аввалроқ «Толибон» ҳаракатининг Кобулга ҳужум бошлагани ҳақида хабар берилган. Кейинчалик Афғонистон ички ишлар вазири пойтахт Кобулнинг «Толибон»га тинч йўл билан топширилишини ваъда қилганди. «Толибон» ҳаракати ҳам террорчиларга Афғонистон ҳудудидан бошқа давлатларга қарши ҳаракатлар олиб боришга йўл қўймаслигини билдирган.
Шунингдек, «Толибон» раҳбарияти жангариларга Кобулга ҳужум қилмаслик ҳақида буйруқ берган ва мамлакат ҳукумати билан ҳаракат отрядларининг шаҳарга тинч йўл билан кириши ҳақида музокараларга киришганди.
Изоҳ (0)