«Толибон» ҳаракати террорчиларнинг Афғонистон ҳудудидан бошқа давлатларга қарши ҳаракатлар олиб боришига йўл қўймаслигига ишонтирмоқда, деб ёзади «ТАСС».
«Биз ҳеч кимга Афғонистон ҳудудидан ҳар қандай мамлакатга, шу жумладан, қўшни давлатларга қарши фойдаланишга йўл қўймаслик тарафдоримиз», — деди ҳаракат вакили Муҳаммад Суҳайл Шоҳин Ҳиндистоннинг ANI агентлигига берган интервьюсида.
Бундан ташқари, у «Толибон» базалари Покистонда жойлашган террорчилик гуруҳлари билан алоқадорлиги ҳақидаги даъволарни рад этди. «Бу асоссиз даъволардир. Улар ҳақиқий фактларга эмас, бизга нисбатан муайян сиёсий муносабатга асосланган», — деди у.
«Толибон» вакили Ҳиндистоннинг афғон халқига ёрдамини қадрлашини айтди. «Улар афғон халқига ёки миллий лойиҳаларга ёрдам бермоқда. Улар буни аввал ҳам қилган. Фикримча, бу қадрланадиган нарса», — деди у.
Ҳиндистон Афғонистондаги воқеалар ривожидан ташвишда ва «Толибон» ҳокимият тепасига келгудек бўлса, Ҳиндистон ҳудудидаги террорчилик гуруҳлари ҳам фаоллашишидан хавфсирамоқда.
Аввалроқ ҳиндистонлик сиёсатшунослардан бири агар «Толибон» ҳокимият тепасига келса, Кашмирнинг Ҳиндистон назорати остидаги қисмига ўтиб бораётган ва Афғонистонда алоқаларига эга бўлган террорчилар гуруҳлари қўшимча кўмак олиши мумкинлигини тахмин қилганди.
Шу билан бирга, «Толибон» вакили Ҳиндистонни Афғонистондаги вазиятга аралашмаслик ва у ерга қўшинларини юбормаслик ҳақида огоҳлантирди.
Бундан ташқари, Шоҳин «Толибон» Афғонистондаги элчихоналарга ёки дипломатларга ҳужум қилиш ниятида эмаслигини қайд этди ва бу ҳақда аввал ҳам кўп бора айтилганини эслатди.
Аввалроқ «Толибон» гуруҳи Афғонистоннинг йириклиги бўйича бешинчи ўринда турадиган ва Нангарҳор вилояти маркази бўлган Жалолобод шаҳрини ўз назорати остига олгани хабар берилди. Жалолобод шаҳри Афғонистон шарқида, Покистон билан чегара яқинида жойлашган. У Кобул билан бир қаторда расмий ҳукумат назорати остида бўлиб турган сўнгги йирик шаҳарлардан бири эди. Шаҳарнинг олиниши «Толибон» учун пойтахтга, тахминан, 150 километрлик тўғри йўл очиб беради. Таъкидланишича, энди Афғонистон ҳудудининг, тахминан, учдан икки қисми «Толибон» томонидан назорат қилинмоқда.
Бу орада АҚШ ва Буюк Британия Афғонистондаги элчихоналаридан ўз дипломатларини эвакуация қилмоқда.
Изоҳ (0)