Тошкент вилояти Қибрай туманида содир бўлган қотилликнинг олдини олишга масъул бўлган ички ишлар органлари ходимлари устидан текширув тайинланди, дея хабар бермоқда ИИВ матбуот котиби Шоҳрух Ғиёсов.
Тошкент вилоятининг Қибрай туманида яшовчи оиланинг 4 нафар аъзоси ва ёлланма ишчи ўлдирилгани ҳақида хабар берилганди. Яқинда «Nemolchi.uz» нашри ушбу воқеа тафсилотларини эълон қилди.
Унда айтилишича, қотиллик оқибатида ҳалок бўлган оила аъзолари бир неча маротаба ички ишлар органларига уларга таҳдид бўлаётгани ҳақида ариза тақдим этган. Лекин «ҳуқуқни муҳофаза қилиш органлари томонидан ҳеч қандай ҳаракат бўлмаган».
ИИВ матбуот хизмати ушбу қотилликнинг олдини олиши мумкин бўлган ходимлари фаолиятига қонуний баҳо берилишини маълум қилди.
«Ижтимоий тармоқларда 2021 йилнинг 29 июль куни Тошкент вилоятининг Қибрай тумани, «Истиқбол» маҳалласидаги хонадонда ўта шафқатсизлик билан икки ва ундан ортиқ шахсларга нисбатан содир этилган қотиллик жиноятининг олди олиниши мумкинлиги ҳақида турли фикр ва мулоҳазалар тарқалмоқда.
Маълум қиламизки, ҳар қандай содир бўлган оғир ёки ўта оғир турдаги жиноятларга олиб келувчи шарт-шароитларни ўрганиш ва уларни бартараф этиш, жиноятни фош этиш бўйича амалга ошириладиган процессуал ҳаракатларининг ажралмас қисмидир.
Мазкур ўта оғир жиноятнинг олдини олишга масъул бўлган ҳар бир мансабдор шахснинг, шу жумладан, ҳудудий ички ишлар органлари ходимларининг фаолиятига қонуний баҳо берилади», – дейилади хабарда.
Шунингдек, текширув натижаси юзасидан жамоатчиликка тўлиқ ахборот етказилиши маълум қилинган.
Эслатиб ўтамиз, ҳолат юзасидан Тошкент вилояти прокуратураси томонидан Жиноят кодексининг 97-моддаси 2-қисми «а, ж» бандлари (ўта шафқатсизлик билан икки ёки ундан ортиқ шахсни қасддан ўлдириш) билан жиноят иши қўзғатилган.
Изоҳ (0)