Фарғона вилояти ҳокими Хайрулло Бозоров соғлиғини тиклаб, иш фаолиятини бошлаган, дея хабар берди «Дарё» мухбири.
Қайд этилишича, 2021 йилнинг 27 июнидан буён Тошкент шаҳрида даволанишда бўлган Хайрулло Бозоров 4 август куни жамоатчилик олдида кўриниш берган. Вилоят раҳбари шу куни Президент Шавкат Мирзиёев Фарғонага ташрифи давомида танқид қилган «Шодиёна» маҳалласи янги биноси ва бошқа ижтимоий соҳа объектларининг очилиш маросимида иштирок этган.
Аввалроқ бир ойдан ортиқ муддат давомида жамоатчиликка кўриниш бермаган Фарғона вилояти ҳокими Хайрулло Бозоров 28 июль куни тадбиркордан 400 минг доллар пора олаётган вақтида қўлга тушгани, шу сабабли ҳам кўринмай қолгани ҳақида хабарлар тарқалди. Вилоят ҳокимлиги ахборот хизмати эса Хайрулло Бозоров 27 июндан буён Тошкент шаҳрида чуқурлаштирилган тиббий даволанишда экани ва секвестрланган бел умуртқа чурраси ташхиси билан бел соҳасида кичик жарроҳлик амалиёти ўтказгани ҳақида маълум қилди.
Изоҳ (0)