Qashqadaryoda klaster rahbari va Qarshi tuman hokimligi o‘rtasidagi sud jarayoni 25-may kuni o‘z ishini davom ettirdi. Sudda qatnashgan tuman hokimi Maqsuda Mustafoyeva o‘tgan sud majlisida ishtirok etgan o‘rinbosari Akrom Aripovning klaster rahbaridan kombaynlar ta’miri uchun pul so‘ralgani haqidagi gapini rad etdi.

Akrom Aripov joriy yil 20-may kuni bo‘lib o‘tgan sud majlisida sudya so‘roviga javoban tuman hokimi bilan birgalikda Sulton Tex Group klaster rahbari Nurbek Ergashevning yoniga borib, kombaynlar ta’miri va g‘alla hosildorligini yaxshilash uchun pul so‘ralganini ta’kidlagandi. Hokim Maqsuda Mustafoyeva esa klaster rahbaridan pul so‘ralmaganini aytdi.

Sudya Maqsuda Mustafoyevaga o‘rinbosarining gapini eslatib, hokim va o‘rinbosari ikki xil ko‘rsatma berayotganini, qay birining gapi to‘g‘riligini so‘radi.

“Unda men yo‘q edim. Bu masalani men hozir sizlardan eshitib turibman”, — dedi tuman hokimi.

Qarshi tuman hokimi so‘ziga ko‘ra, tumandagi 560 nafar fermer joriy yil boshida klaster bilan tuzgan shartnomasi bekor bo‘lmasa-da, yangi tashkil etilayotgan kooperatsiya bilan ixtiyoriy tarzda shartnoma tuzgan. Shartnoma tuzmagan fermerlar 9 nafarni tashkil qiladi.

Maqsuda Mustafoyevaning aytishicha, Xalq deputatlari tuman kengashining qarori bilan Sulton Tex Group faoliyati to‘xtatilgach, tuman hokimligi va fermerlar qishloq xo‘jaligi ishlarini bajarishda qiyinchilikka uchragan.

“O‘sha kunlarda Nurbek Ergashev davlat ishlarini shunchalik orqaga tortdiki, bu kishini topib bo‘lmay qoldi. Chunki o‘g‘it bu kishida, chigit bu kishida, texnika bu kishida. Traktorlarini ham topib bo‘lmay qoldi. Biz shunchalik azoblandikki, hatto eslariga ham kelmadik. Men davlatning ishiga xalal beryapman-ku, aholini och qoldiryapman-ku, degan gapni xayoliga ham keltirmadi. Biz shuning uchun kooperatsiya bilan kelishib, ishlarni bajardik. Klaster haydagan yerlarga haliyam kultivatsiya topolmayapmiz. Fermerlar klasterdan so‘rab borsa, hatto pulga ham texnikasini bermadi”, — dedi Maqsuda Mustafoyeva.

Sudda so‘z olgan Biznes-ombudsman vakili Sheroz Shodiyev klaster o‘rniga tashkil etilgan kooperatsiya Xalq deputatlari tuman kengashi qarori bilan tashkil etilishi qonunga zid ekanligini bildirib, kengash raisi bo‘lgan hokimdan bu holatga izoh so‘radi.

Hokim esa kengash qaroridagi “tashkil qilinsin” degan so‘z taklif ma’nosini bildirishini aytib, kooperatsiya tuzishga taklif berilganini bildirdi.

Biznes-ombudsman vakili hokimdan sudda klaster rahbaridan kombaynlar ta’miri uchun pul so‘raganini rad etganini eslatib, O‘ktam Barnoyev hamda viloyat hokimi Zoir Mirzayevga yozgan xatida 5 milliard 636 million so‘m haqida so‘z borganini, xatda hokim sifatida klaster bu pulni to‘lamayotganidan shikoyat qilishining sababini so‘radi.

Hokim esa pul so‘ralganini yana inkor qilib, buni o‘zidan yuqori turuvchi mansabdorlarga taklif sifatida yozganini aytdi.

Sud 10 kunlik tanaffusdan so‘ng 5-iyun kuni o‘z ishini davom ettiradigan bo‘ldi.