Навоий шаҳрида жойлашган газ қуйиш шохобчасида портлаш содир бўлиб, ёнғин келиб чиқди, дея хабар бермоқда Фавқулодда вазиятлар вазирлиги матбуот хизмати.
Маълум қилинишича, 12 август куни соат 19:16 да Навоий вилояти, Навоий шаҳар, Меъморлар кўчасида жойлашган, пропан газ қуйиш шохобчасида ёнғин содир бўлаётгани тўғрисида Фавқулодда вазиятлар бошқармасига хабар келиб тушган.
Ушбу ҳолат бўйича ёнғин жойига 9 та ёнғин-қутқарув экипажи жалб этилган. Биринчи ёнғин-қутқарув экипажи соат 19:18 да воқеа жойига етиб бориб, соат 19:45 да ёнғин қуршаб олинган ва соат 19:53 да ёнғин батамом ўчирилган.
Ёнғин келиб чиқиш сабаби «ЗИЛ-130» русумли пропан ёқилғи ташиш автомобили ўзидаги суюлтирилган газни тўкиш вақтида чақнаш содир бўлган, оқибатда юк автомобилига фойдаланиш учун ўрнатилган газ баллони ёрилиши сабаб ёнғин келиб чиққан.
«ЗИЛ-130» русумли суюлтирилган ёқилғи ташиш автомобилига ўрнатилган сиғимга зарар етмаган.
Ҳодиса оқибатида шохобча яқинидан ҳаракатланиб кетаётган «Москвич-412» русумли автомашина ҳайдовчиси ва 3 нафар йўловчиси турли даражада куйиш тан жароҳатини олган, ҳалок бўлганлар йўқ.
Бундан аввал Сергелидаги омборхоналардан бирида газ портлаши оқибатида бир киши ҳалок бўлгани, Самарқандда ёқилғи қуйиш шохобчасидаги портлаш оқибатида бир киши ҳалок бўлгани ҳамда Намангандаги хонадон ошхонасида газ портлаши оқибатида 12 ёшли бола ҳалок бўлгани ҳақида хабар берилганди.
Изоҳ (0)