Ўзбекистонда ташкил этилган «Любая бизнес хороша», «Плати-лети», «С 707» ва бошқа МЧЖ мансабдорларига жиноий иш очилгани ҳақида хабар берилганди. Бош прокуратура «Дарё»нинг сўровига асосан берган маълумотларга кўра, ушбу жиноий ишни судга юбориш арафасида.
Қайд этилишича, Бош прокуратура ҳузуридаги Департаментининг Мирзо Улуғбек тумани бўлими томонидан «Любая бизнес хороша», «Плати-лети», «С 707» ва бошқа МЧЖ мансабдор шахсларига нисбатан Жиноят кодексининг 179-моддаси 1-қисми (сохта тадбиркорлик), 184-моддаси 3-қисми (солиқлар ёки бошқа мажбурий тўловларни тўлашдан бўйин товлаш), 189-моддаси 1-қисми (савдо ёки хизмат кўрсатиш қоидаларини бузиш) билан жиноят иши қўзғатилган.
Мазкур жиноят иши бўйича Тошкент шаҳар прокуратураси томонидан дастлабки тергов ҳаракатлари олиб борилиб, юқорида кўрсатилган жамиятларнинг молиявий-хўжалик фаолиятини олиб борган 2 нафар шахсга нисбатан Жиноят кодексининг тегишли моддалари билан айб эълон қилиб, жиноят ишини мазмунан кўриб чиқишлик учун судга юбориш арафасида.
Маълумот учун, 2020 йил июнида Сурхондарёда «Вой Мани Окаҳонларим» номли, йирик шохли қорамолларнинг сут берадиган зотларини кўпайтириш билан шуғулланувчи оилавий корхона рўйхатдан ўтказилган эди. Кейинчалик корхона номи «Акбар Али Адолат» деб ўзгартирилган. 2020 йил майида Жиззах вилоятида «Вапше маладес бала» номли, кенг ассортиментдаги товарлар улгуржи савдоси бўйича агентлар фаолияти билан шуғулланувчи компания рўйхатдан ўтказилгани маълум бўлган.
Изоҳ (0)