Ўзбекистонда дам олиш кунлари салқин об-ҳаво бўлиши кутилмоқда

Ғарбий Қозоғистон ҳудудидан салқин ҳаво кириб келиши ҳисобига 13 август куни кундуз кунги ҳарорат 32-34 даражагача пасаяди, деб хабар бермоқда «Ўзгидромет». Фақат жанубнинг энг чеккасида 36-38 даражагача бўлган нисбатан иссиқ ҳарорат сақланиб туради.

Қайд этилишича, дам олиш кунлари республика ҳудудига салқин кириб келиши давом этади ва кундуз кунги ҳарорат 28-31 даражагача, жанубда эса 33-36 даражагача пасаяди. Кечалари ҳам салқин бўлади. Кечаси ва эрта тонгда ҳарорат 13-18 даражагача пасаяди.

Совуқ фронт ўтиши ҳисобига баъзи жойларда шамол тезлиги 17-22 метр/секундгача кучайиши кузатилади. Ҳудуднинг текислик қисмида эса қуруқ об-ҳаво сақланиб туради, фақат баъзи жойларда булутлар пайдо бўлади.

Тоғли ҳудудларда маҳаллий қисқа муддатли ёмғир ёғиши мумкин. Бунинг ҳисобига республиканинг тоғ олди ва тоғли ҳудудларида сел келиши хавфи бор.

Шу сабабли «Ўзгидромет» тоғ олди ва тоғли ҳудудларда жойлашган анъанавий дам олиш масканларига боришда эҳтиёт бўлишга чақирган.