G‘arbiy Qozog‘iston hududidan salqin havo kirib kelishi hisobiga 13-avgust kuni kunduz kungi harorat 32-34 darajagacha pasayadi, deb xabar bermoqda “O‘zgidromet”. Faqat janubning eng chekkasida 36-38 darajagacha bo‘lgan nisbatan issiq harorat saqlanib turadi.
Qayd etilishicha, dam olish kunlari respublika hududiga salqin kirib kelishi davom etadi va kunduz kungi harorat 28-31 darajagacha, janubda esa 33-36 darajagacha pasayadi. Kechalari ham salqin bo‘ladi. Kechasi va erta tongda harorat 13-18 darajagacha pasayadi.
Sovuq front o‘tishi hisobiga ba’zi joylarda shamol tezligi 17-22 metr/sekundgacha kuchayishi kuzatiladi. Hududning tekislik qismida esa quruq ob-havo saqlanib turadi, faqat ba’zi joylarda bulutlar paydo bo‘ladi.
Tog‘li hududlarda mahalliy qisqa muddatli yomg‘ir yog‘ishi mumkin. Buning hisobiga respublikaning tog‘ oldi va tog‘li hududlarida sel kelishi xavfi bor.
Shu sababli “O‘zgidromet” tog‘ oldi va tog‘li hududlarda joylashgan an’anaviy dam olish maskanlariga borishda ehtiyot bo‘lishga chaqirgan.
Izoh (0)