Adidas компанияси Reebok брендини 2,1 млрд долларга сотади

Adidas компанияси Reebok брендини сотиш бўйича келишув амалга ошиши ҳақидаги режаларини эълон қилди, деб хабар беради Esquire.

Харидор — Sports Illustrated, Brooks Brothers ва Nine West каби 30 дан ортиқ брендларга эгалик қилувчи Authentic Brands Group компанияси. У спорт бренди учун 2,1 миллиард доллар тўлайди, бу экспертлар олдинроқ тахмин қилган нархдан юқорироқ. Битимни 2022 йилнинг биринчи чорагида якунлаш режалаштирилган.

Маълумот учун, Adidas компанияси Reebok’ни 2006 йилда 3,8 миллиард долларга сотиб олган, 2016 йилда эса бренд қайта ташкил этилиб, қайта молиялаштирилган. Бу Reebok’нинг молиявий кўрсаткичларини яхшилаган, аммо «қайта ишга тушириш» барибир етарлича муваффақият келтирмаган. Шунингдек, бренд пандемия оқибатларидан жиддий зарар кўрган: 2020 йилнинг иккинчи чорагида Reebok даромади 42 фоизга тушиб кетган.

2020 йилда Adidas Reebok учун 2025 йилга қадар стратегия ишлаб чиқилганига қарамай, уни сотиш бўйича қарор қабул қилган. «Reebok’нинг сотилиши Adidas’нинг на жорий йилдаги прогнозларига ва на компаниянинг 2025 йилгача бўлган мақсадларига таъсир кўрсатади», — дейилади компания хабарида.

Аввалроқ Legо ва Adidas ҳамкорликда ҳақиқий ўлчамдаги Superstar кроссовкаси конструкторини ишлаб чиқаргани тўғрисида хабар берилганди.