Украинанинг Bees Airline авиакомпанияси «Ўзавиация» рухсатисиз Киев ва Самарқанд ўртасида авиачипталар сотувини бошлади

Украинанинг Bees Airline авиакомпанияси 2021 йил 9 августидан Киев—Самарқанд—Киев йўналишидаги рейсларга чипталар сотуви бошланганини эълон қилди. Транспорт вазирлиги матбуот хизмати ушбу авиакомпания томонидан Ўзбекистонга парвозларни йўлга қўйиш юзасидан мурожаатлар бўлмаганини маълум қилди.

Транспорт вазирлигининг қайд этишича, Bees Airline авиакомпанияси томонидан мунтазам парвозларни йўлга қўйиш бўйича ҳам, бир марталик чартер парвозларни бажаришни ташкил этиш юзасидан ҳам «Ўзавиация» агентлигига шу вақтга қадар ҳеч қандай сўров келиб тушмаган.

«Хорижий мамлакатлар авиакомпаниялари Ўзбекистон фуқаро авиацияси аэродромларига бир марталик (чартер) рейсларни амалга ошириш учун ваколатли органнинг Ўзбекистон Республикаси Транспорт вазирлиги ҳузуридаги Фуқаро авиацияси агентлигининг тегишли рухсатномасини олиши ва ана шундан сўнг авиачипталар сотувини бошлаши лозим.

Зеро ваколатли органнинг чартер қатновини бажариш бўйича тегишли рухсатномаси мавжуд эмаслиги натижасида авиакомпаниялар томонидан эълон қилинган йўналишдаги парвознинг бекор қилиниши йўловчилар орасида ижтимоий кескинликнинг вужудга келишига олиб келади», — деб таъкидланган вазирлик хабарида.

Шу муносабат билан Транспорт вазирлиги бугунги кунда Ўзбекистон ва Украина авиация маъмуриятлари ўртасида фақатгина Тошкент—Киев йўналишида парвозларни амалга ошириш юзасидан келишув мавжудлигини эслатиб ўтиб, хорижий авиакомпаниялардан йўловчиларнинг ҳуқуқлари ва ташувчининг мажбуриятларига қатъий риоя этишга чақирган.

Самарқанд вилояти туризм ва спорт бош бошқармаси матбуот хизмати хабарига кўра, 10 август куни Ўзбекистоннинг Киев шаҳрида жойлашган Украинадаги элчихонасида Киевдан Самарқанд шаҳрига мунтазам рейслар очилиши муносабати билан тантанали тадбир бўлиб ўтди. Тадбирни Ўзбекистоннинг Украинадаги элчиси Алишер Курманов очган. Ушбу хабарда ҳам Украина давлатининг лоукостерлардан бири бўлган Bees Airline Самарқандга биринчи парвозини 30 августдан бошлаб ишга туширишни режалаштираётгани қайд этилган.

Эслатиб ўтамиз, Ўзбекистон ва Украина ўртасида тўғридан-тўғри доимий парвозларни тиклаш масаласи узоқ вақтдан бери муҳокама қилиб келинмоқда. Uzbekistan Airways Тошкент—Киев—Тошкент йўналишида парвозларни амалга оширишни 2015 йилнинг май ойида тўхтатган.