Mirziyoyev “barcha sharoitlarini muhayyo qilish” bo‘yicha topshiriq bergan Namangandagi bolalar uyi ta’mirdan chiqdi. Prezident muassasaga Nexia sovg‘a qildi

Prezident Shavkat Mirziyoyev 2021-yil fevralida Namanganga tashrifi chog‘ida viloyatdagi 26-mehribonlik uyida bo‘lib, bu yerda tarbiyalanuvchilar uchun “barcha sharoitlarni muhayyo qilish” bo‘yicha ko‘rsatma bergandi. Qaytadan mukammal ta’mirlangan muassasa 12-avgust kuni foydalanishga topshirildi, deya xabar bermoqda “Daryo” muxbiri Azizbek Abduvaliyev.

Mehribonlik uyidagi qurilish-ta’mirlash ishlariga 8 milliard so‘m sarflangan — hududdagi 6,5 ming kvadrat metrdan ziyod yo‘l asfaltlangan, barcha maydonlar obodonlashtirilgan, binolar, xususan, 76 tarbiyalanuvchiga mo‘jallangan yotoqxona, o‘quv xonalari, 10 turdagi to‘garak xonalari, 80 o‘rinli oshxona, yopiq basseyn, sport zali ta’mirlangan, ochiq sport va o‘yin maydonchalari yangidan qurilib, o‘quv-texnika vositalari va jihozlar o‘rnatilgan.

Mehribonlik uyining qaytadan ochilishiga bag‘ishlangan tantanali marosimda muassasaga Prezident sovg‘asi — Nexia-3 avtomobili ham toshirilgan.

Ma’lumot uchun, ushbu mehribonlik uyi 2004-yilda tashkil topgan bo‘lib, hozirda bu yerda 40 nafar tarbiyalanuvchi bor. Qayd etish joiz, Shavkat Mirziyoyevning tashrifidan so‘ng bir qator tarbiyalanuvchilarni, xususan, Prezident ko‘targan qizaloqni ota-onalari olib ketgan edi.