Латвия ҳукумати ноқонуний муҳожирлар билан боғлиқ вазият туфайли Беларусь билан чегарадош ҳудудларда фавқулодда ҳолат жорий этди. Бу ҳақда Meduza хабар берди.
Хабарга кўра, чегарага туташ Лудза, Краслава, Аугшдаугав ўлкаларида, шунингдек, Даугавпилс шаҳрида фавқулодда ҳолат эълон қилинган. У 11 августдан 10 ноябргача амал қилади.
Ушбу ҳудудларда фавқулодда ҳолат тугамагунча, давлат идоралари қочқин мақомини олиш масаласидаги аризаларни қабул қилмайди. Чегарачиларга чегарадан ноқонуний ўтиб келган одамларни Беларусга қайтариш учун куч ва махсус техникадан фойдаланишга рухсат берилди. Латвия қуролли кучлари ва полицияси чегарачиларга ёрдам беради.
Фавқулодда вазият — бу ҳукуматга давлат органлари ва маҳаллий ўзини ўзи бошқариш органларининг, жисмоний ва юридик шахсларнинг ҳуқуқ ва эркинликларини чеклаш, шунингдек, уларга қўшимча мажбуриятлар юклаш имконини берадиган махсус ҳуқуқий режим.
Латвия бош вазир Кришянис Кариниш ва ички ишлар вазири Мария Голубева бундай қатъий чоралар кўрилишига изоҳ берар экан, ноқонуний муҳожирлар оқими Европа Иттифоқи мамлакатларига эълон қилинган «гибрид уруш» эканини айтди.
Биргина ўтган 24 соат ичида Латвия ва Беларусь чегарасида 200 дан ортиқ одам ҳибсга олинди — бу бутун 2020 йилдагига қараганда 7 баравар кўп.
Латвияга қўшни Литвада июль ойининг охиридан бери фавқулодда ҳолат режими амал қилмоқда. Мамлакат Беларусь билан чегарада тўсиқ қуришни бошлаган. Шунингдек, Литва ҳукумати ўз ихтиёри билан мамлакатни тарк этишга рози бўлган ноқонуний муҳожирларга 300 евродан тўлашга ваъда бермоқда.
Беларусь ва Европа Иттифоқи чегарасидаги миграцион инқироз Александр Лукашенконинг Минск энди Европани муҳожирлардан ҳимоя қилмоқчи эмаслигини айтганидан кейин бошланди. Шундан сўнг, оммавий ахборот воситаларида хабар берилишича, беларуслик чегарачилар чегарани ноқонуний кесиб ўтмоқчи бўлган одамларга жиддий тўсқинлик қилмаслик ҳақида яширин кўрсатма олган.
Изоҳ (0)