«Толибон» ҳаракати жангарилари Афғонистон шимолидаги Саманган вилоятининг маъмурий маркази — Айбек шаҳри устидан назорат ўрнатди. Бу ҳақда Anadolu агентлигига вилоят маҳаллий кенгаши раҳбари ўринбосари Муҳаммад Ҳошим Сарварий маълум қилди.
Унинг сўзларига кўра, 9 августга ўтар кечаси жангарилар Айбек шаҳрига қаратилган ҳужумларни жадаллаштирган.
Куннинг иккинчи ярмида ҳукумат кучлари билан тўқнашувлардан кейин «Толибон» Саманган маъмурий маркази устидан назоратни ўз қўлига олишга муваффақ бўлган.
Айни вақтда Саманганнинг 7 та туманидан 3 таси ҳозирча ҳукумат кучлари қўл остида қолмоқда, деди Сарварий.
«Толибон»нинг ўзи маълум қилишича, Айбекдаги барча маъмурий бинолар жангарилар назоратига ўтган.
Қайд этилишича, бу Афғонистонда «Толибон» қўл остига ўтган вилоят пойтахтларининг олтинчисидир. Маҳаллий оқсоқоллар ҳукуматдан шаҳарда жангларни тўхтатишни сўраганидан кейин, жангарилар шаҳарга жангсиз киргани айтилмоқда. «Губернатор бунга рози бўлиб, барча қўшинларни шаҳардан чиқариб кетди», — деди вилоят губернатори ўринбосари Сефатулла Саманганий.
Айни пайтда «Толибон» ўз жангариларининг Афғонистон шимолидаги энг йирик шаҳар — Мозори Шарифга кирганини эълон қилди, аммо бу маълум тасдиқлангани йўқ.
Аввалроқ «Толибон» икки кеча-кундуз давом этган жанглар оқибатида Жузжон вилоятининг Шибирғон шаҳрини қўлга киритган эди. У «Толибон» томонидан сўнгги бир сутка ичида эгаллаб олинган иккинчи маъмурий марказга айланганди.
Бунгача улар Эрон билан чегарадаги Нимруз вилояти пойтахти Саранж шаҳрига бостириб кирган эди, бу эса «Толибон» сўнгги беш йил ичида Афғонистон вилоятларидан бирининг маъмурий марказини эгаллаб олиши билан боғлиқ биринчи ҳолат бўлди.
Кейинроқ Афғонистон хавфсизлик кучлари «Толибон» ҳаракати жангарилари билан жангларда мамлакат шимолидаги Қундуз ва Сарипул вилоятларининг маъмурий марказлари устидан назоратни қўлдан бой берди. Шунингдек, «Толибон» ҳаракати Тожикистон билан чегара яқинида жойлашган Тохар шимолий вилояти пойтахти Талукан шаҳрини эгаллаб олганини маълум қилди.
Изоҳ (0)