Туркия президенти Ражаб Тоййиб Эрдўғон ёнғинлардан вайрон бўлган ҳудудларни тиклаш учун киши бошига уч тупдан кўчат экишга ваъда берди. Бу ҳақда Туркиянинг Haberler порталига таяниб, «Korrespondent.net» хабар берди.
«Мамлакатимиз аҳолисининг ҳар бирига уч туп кўчат экамиз. Ҳаммаси бўлиб 252 миллион кўчат экилади», — деди Эрдўғон. У, шунингдек, ёниб кетган ҳудудлар ичида бирорта ҳам қурилишга рухсат бермаслигини таъкидлади.
Расмийларнинг маълумотларига кўра, июль ойининг охиридан бери Туркиянинг 44 вилоятида содир бўлган 208 ёнғиннинг 196 таси бартараф этилган. Республика Соғлиқни сақлаш вазирлиги раҳбари Фахриддин Кожанинг айтишича, табиий офат қурбонлари сони саккиз кишига, жароҳатланганлар сони 864 кишига етган.
Айни пайтда Туркияда ўрмонларга ўт қўйишда гумонланиб, олти киши ҳибсга олинган. Хусусан, 2 август куни Милас туманидаги полиция ходимлари маҳаллий аҳолидан тўрт кишини ёнувчи аралашма билан қўлга олган. Бодрумда ёнаётган сигарет қолдиқларини машинадан ташлаган яна бир неча киши ҳибсга олинди.
Аввалроқ Эрдўғон Анталияни фалокат ҳудуди деб эълон қилгани, унинг матбуот котиби Иброҳим Калиннинг эса ўрмон ёнғинларини мамлакат учун миллий фалокат деб атагани ҳақида хабарлар берилган.
Шунингдек, Эрдўғон ёнғинларнинг уюштирилганини қайд этган ва олов ёққанлиги гумон қилинаётганлардан бирининг ҳибсга олинганини маълум қилган. Туркияда террорчилик ташкилоти деб топилган «Курдистон ишчи партияси»нинг «Олов болалари» шўъба гуруҳи ўрмон ёнғинларининг уюштирилганлиги юзасидан масъулиятни ўз зиммасига олган.
Изоҳ (0)