Turkiya prezidenti Rajab Toyyib Erdo‘g‘on yong‘inlardan vayron bo‘lgan hududlarni tiklash uchun kishi boshiga uch tupdan ko‘chat ekishga va’da berdi. Bu haqda Turkiyaning Haberler portaliga tayanib, “Korrespondent.net” xabar berdi.
“Mamlakatimiz aholisining har biriga uch tup ko‘chat ekamiz. Hammasi bo‘lib 252 million ko‘chat ekiladi”, — dedi Erdo‘g‘on. U, shuningdek, yonib ketgan hududlar ichida birorta ham qurilishga ruxsat bermasligini ta’kidladi.
Rasmiylarning ma’lumotlariga ko‘ra, iyul oyining oxiridan beri Turkiyaning 44 viloyatida sodir bo‘lgan 208 yong‘inning 196 tasi bartaraf etilgan. Respublika Sog‘liqni saqlash vazirligi rahbari Faxriddin Kojaning aytishicha, tabiiy ofat qurbonlari soni sakkiz kishiga, jarohatlanganlar soni 864 kishiga yetgan.
Ayni paytda Turkiyada o‘rmonlarga o‘t qo‘yishda gumonlanib, olti kishi hibsga olingan. Xususan, 2-avgust kuni Milas tumanidagi politsiya xodimlari mahalliy aholidan to‘rt kishini yonuvchi aralashma bilan qo‘lga olgan. Bodrumda yonayotgan sigaret qoldiqlarini mashinadan tashlagan yana bir necha kishi hibsga olindi.
Avvalroq Erdo‘g‘on Antaliyani falokat hududi deb e’lon qilgani, uning matbuot kotibi Ibrohim Kalinning esa o‘rmon yong‘inlarini mamlakat uchun milliy falokat deb atagani haqida xabarlar berilgan.
Shuningdek, Erdo‘g‘on yong‘inlarning uyushtirilganini qayd etgan va olov yoqqanligi gumon qilinayotganlardan birining hibsga olinganini ma’lum qilgan. Turkiyada terrorchilik tashkiloti deb topilgan “Kurdiston ishchi partiyasi”ning “Olov bolalari” sho‘ba guruhi o‘rmon yong‘inlarining uyushtirilganligi yuzasidan mas’uliyatni o‘z zimmasiga olgan.
Izoh (0)