Қашқадарё вилоятида суд жараёнини ёритиш истагини билдирган блогерлар кўпинча судьяларнинг қаршилигига, «ҳужжатингиз йўқлиги сабабли судни тасвирга олишингизга рухсат беролмаймиз», қабилидаги жавобга дуч келади. Шундай тўсиққа учраётган блогерлар нима қилиши керак? Қашқадарё вилоят суди раиси ўринбосари Ўткир Мамадалиев шунга аниқлик киритди, дея хабар берди «Дарё» мухбири.
Таъкидланишича, бу ҳақда Қарши шаҳридаги Журналистлар уйида вилоят суди масъуллари иштирокида бўлиб ўтган матбуот анжуманида сўз борган.
Матбуот анжуманида сўз олган «Дарё» мухбири вилоятда фаолият олиб борувчи блогерлар суд жараёнларини ёритишда муаммога дуч келаётганини, блогерлигини тасдиқловчи гувоҳномаси йўқлиги рўкач қилиниб, судга камерасиз ёки видеотасвирга олиш мўлжалланган телефонсиз кириши кераклиги талаб қилинаётганини айтиб, «бугунги кунда блогерлар ҳам ОАВ вакили, демакки, судда журналистнинг тасвирга олишига рухсат этилгач, бу имконият блогерга ҳам берилиши керакмасми? Афсуски, вилоятда фаолият юритувчи судьялар бундай вазиятга дуч келганда, блогернинг тасвирга олиш ҳуқуқини тан олмаяпти. Бундай пайтда блогерлар нима қилиши керак?», — дея савол берди.
Мазкур саволга жавоб беришга уринган Қашқадарё вилоят суди раиси Абдуқаюм Маҳкамов аниқ жавоб беришдан тийилиб, гапни олиб қочди. Жавоб ОАВ вакилларини қониқтирмагач, саволга унинг ўринбосари Ўткир Мамадалиев аниқлик киритди.
«Тўғри, бу муаммо кузатилмоқда. Одатда судга борган блогернинг ҳужжати бўлмагани сабаб у судга оддий кузатувчи фуқаро сифатида киритилмоқда. Бироқ блогерларга қарата шуни айтмоқчимизки, майли суд биносига киришда Миллий гвардия ходими сизнинг фотокамера олиб киришингизга қаршилик қилса-да, суд жараёни бошлангач, судьяга илтимоснома киритган журналистларга фотокамерадан фойдаланишга рухсат этилса, сиз ҳам блогер эканингизни судга билдириб, бу имкониятдан фойдаланишингиз мумкин. Бунга ҳақингиз бор», — деди Ўткир Мамадалиев.
Эслатиб ўтамиз, аввалроқ қашқадарёлик блогер Отабек Ортиқов суд жараёнини ёритиш мақсадида Жиноят ишлари бўйича Шаҳрисабз туман судига борганида, ундан блогерлигини тасдиқловчи ҳужжатини сўрашгани, ҳужжати бўлмагани боис суд жараёнини камера олишга мўлжалланган телефонини олиб қўйишгани ҳақида ёзганди.
Изоҳ (0)