Ўзбекистонлик 38 нафар ўқувчи FLEX (Бўлажак лидерлар алмашинуви) дастури доирасида Америка Қўшма Штатларига бир йилга таълим олиш учун юборилади. Бу ҳақда 4 август куни бўлиб ўтган FLEX—2021 алмашинув дастури ғолибларини АҚШга кузатишга бағишланган тадбирда маълум қилинди, дея хабар бермоқда «Дарё» мухбири Мусулмонбек Иброҳимов.
Тадбирда таъкидланишича, Ўзбекистондан 2006 йилдан буён FLEX (Бўлажак лидерлар алмашинуви) дастури бўйича 15 йилдан кейин яна АҚШга мактаб ўқувчилари юборилмоқда. Мактаб ўқувчилари бўлган бу иштирокчилар 2021/2022-ўқув йили давомида Америка мактабларида ўқийди ҳамда Америкадаги мезбон оилалар билан бирга яшайди.
Анжуман давомида «Дарё» мухбирининг нима сабабдан 15 йил FLEX дастури бўйича Ўзбекистондан ўқувчилар АҚШга ўқишга юборилмай қўйганлиги ҳақидаги саволга АҚШнинг Ўзбекистондаги элчиси Даниел Розенблюм жавоб берди. Элчининг айтишича, бунга икки мамлакат ўртасидаги баъзи бир келишмовчиликлар сабаб бўлган.
«Икки халқ ўртасида баъзи бир ҳолатларда келишмовчиликлар бўлган. Лекин кейинги йилларда, айниқса, тўрт йилдан буён муносабатларимиз яхши даражага кўтарилди. Шу боис бу дастурни яна қайтадан амалга оширишга мувоффақ бўлдик. Унгача Ўзбекистон ва АҚШ муносабатларида қандайдир келишмоқчиликлар бўлган. Хусусан, алмашинув дастурларини йўлга қўйиш бўйича ҳам. Лекин кейинги йилларда дастур яхши амалга оширилмоқда», — деди элчи Даниел Розенблюм.
Жаноб элчининг қўшимча қилишича, АҚШдан талабалар, олимлар, инглиз тили ўқитувчилари ва бошқа мутахассислар ҳам Ўзбекистонга келиб, мактабларда, университетларда, бошқа бир муассасаларда ишламоқда, дарс бериб, таълим олмоқда.
FLEX дастури 1993—1994 йилларда собиқ сенатор Билл Бредли томонидан АҚШ ва Евросиё мамлакатлари ўртасида узоқ муддатли тинчлик ва ўзаро тушунишни таъминлаш мақсадида тузилган ва йўлга қўйилган. Дастур хорижлик ёшларга АҚШ ва америкаликлар билан бевосита танишиш имконини беради, шу билан бирга у Евросиё маданияти ва мамлакатларини америкаликларга таништиради. Бугунга қадар 22 мамлакатдан келган 29 мингдан ортиқ ўқувчи FLEX дастурида иштирок этган.
Халқаро таълим бўйича 1993 йилдан буён Америка Кенгашлари FLEX дастурига Ўзбекистондан 947 нафар иштирокчини юборган. Қўшма Штатларда FLEX иштирокчилари етакчилик кўникмаларига эга бўлади, Америка жамияти ва қадриятлари билан танишади, америкаликларга ўз мамлакатлари ва маданиятларини ўргатади. FLEX талабалари АҚШ жамиятида жамоат ишларида иштирок этади ва ўз мамлакатлари вакили вазифасини бажаради. Уларнинг кўпчилиги дастур давомида орттирган маҳорат ва ғоялардан фойдаланган ҳолда ўз мамлакатларида инновацион лойиҳаларни ишлаб чиқади ва амалга оширади.
FLEX — катта танлов ва ўқувчиларнинг ўқишдаги муваффақиятига асосланиб, АҚШ Давлат департаменти молиялаштирадиган дастур бўлиб, у Арманистон, Озарбайжон, Чехия, Эстония, Грузия, Греция, Венгрия, Қозоғистон, Қирғизистон, Латвия, Литва, Молдова, Мўғулистон, Черногория, Польша, Руминия, Сербия, Словакия, Тожикистон, Туркманистон, Украина ва Ўзбекистонда фаолият олиб боради. Ҳар йили 35 мингдан ортиқ ўқувчи FLEX стипендиясини олиш учун бир нечта тест синовларида қатнашади, бу уларга бир ўқув йилида Қўшма Штатлардаги мезбон оилада яшаш ҳамда АҚШ мактабларида ўқиш имконини беради.
Изоҳ (0)