Qashqadaryoda faoliyat yurituvchi hokimlar chiqargan qarorlarning 94 tasi sudda haqiqiy emas deb topilgan. Bu haqda Qarshi shahridagi Jurnalistlar uyida viloyat sudi mas’ullari bilan bo‘lib o‘tgan matbuot anjumanida ma’lum qilindi, deya xabar berdi “Daryo” muxbiri.
Ta’kidlanishicha, matbuot anjumanida so‘z olgan viloyat Ma’muriy sudi raisi Xolis Muhammedov sud tomonidan 2021-yilning o‘tgan davri mobaynida 947 ta ish ko‘rib chiqilganini ma’lum qilgan.
“Viloyat Ma’muriy sudlari tomonidan 947 ta ma’muriy ish ko‘rib chiqilgan bo‘lib, shundan 476 ta da’vo arizasi qanoatlantirilgan. 256 ta ariza rad etilgan. 37 ta ariza bo‘yicha ish yuritishdan tugatilgan. 27 ta ariza ko‘rmasdan qoldirilgan”, — deydi Xolis Muhammedov.
Sud raisining ma’lumot berishicha, o‘tgan davr mobaynida sudga ma’muriy organning qarorlarini haqiqiy emas deb topish bo‘yicha 243 ta, ma’muriy organning xatti-harakatlarini qonunga xilof deb topish bo‘yicha 78 ta, saylov komissiyalari harakatlari yuzasidan 4 ta, notariusning harakatini qonunga xilof deb topish to‘g‘risida 1 ta, davlat ro‘yxatidan o‘tkazishni rad etish ustidan 1 ta, xususiy notarius litsenziyasining amal qilish muddatini tugatish bo‘yicha 1 ta, muayyan yashash joyiga ega bo‘lmagan shaxslarni reabilitatsiyaga joylashtirish bo‘yicha 151 ta ish ko‘rib chiqilgan.
2021-yilning o‘tgan davri mobaynida sud tomonidan ko‘rilgan ishlarning 65 tasida tadbirkorlik subyektlari davogar sifatida qatnashgan va 20 ta ishda ularning da’vosi qanoatlantirilgan.
“Hokim qarorlarini haqiqiy emas deb topish bo‘yicha 243 ta ish ko‘rilgan bo‘lib, shundan hokimlar tomonidan chiqarilgan 94 ta qaror haqiqiy emas deb topilgan”, — deydi Xolis Muhammedov.
Sud raisining aniqlashtirishicha, viloyatda qarorlari eng ko‘p bekor qilingan hokimlar uchligida Qarshi shahar, Qarshi tuman va Koson tumani hokimlari turibdi.
Eslatib o‘tamiz, avvalroq Qarshi shahar hokimi vafot etgan fuqaroga yer berib, marhumga 10 kunda hujjatlarni rasmiylashtirish vazifasini yuklagani, mazkur ishni sudya Azamat Xushvaqov ko‘rib chiqib, hokim qarorini haqiqiy emas deb topgani xabar berilgandi.
Izoh (0)