Зоминнинг икки кун аввал ўрмон ёнғини юз берган тоғларида ёнғоқ катталигида дўл ёғди

Жиззах вилояти Зомин тумани «Дуоба» тоғли ҳудудларида 3 август куни дўл ёғди. Ижтимоий тармоқларда ҳолат акс этган фото ва видеолар тарқалди.

Гидрометеорологик илмий таҳлиллар, об-ҳаво прогнозлари, тадқиқотлар, маърузалар каналининг ёзишича, баъзи дўлларнинг катталиги ёнғоқдек ҳажмни ташкил этган. Кучли жала ва дўл ёғиш ҳодисаларидан сўнг Зомин тоғликларида ҳаво ҳарорати кескин пасайиб кетди.

Эслатиб ўтамиз, бундан икки кун аввал, 1 август куни соат 10:40 ларда Жиззах вилояти Зомин тумани «Дуоба» тоғли ҳудудларида дала майдонида ёнғин содир бўлганди. Оловни ўчириш учун 400 га яқин ходим ва 4 та вертолёт жалб этилган.

2 август куни ушбу ҳудудда яна ёнғин содир бўлгани ҳақида хабарлар тарқалди. Аммо Жиззах вилояти Фавқулодда вазиятлар бошқармаси буни рад этиб, ҳудудда ёнғиндан кейинги тозалаш ишлари амалга оширилаётгани, вазият тўлиқ назорат остида эканлигини маълум қилди.