Андижон вилояти Бўстон (собиқ Бўз) тумани ҳокими Садбархон Мамитова 31 июль куни оғир хасталикдан вафот этди, дея хабар бермоқда «Дарё» мухбири Умиджон Мамарасулов.
«Дарё» мухбирининг қайд этишича, Садбархон Мамитова июнь ойидан буён Республика шошилинч тиббий ёрдам илмий маркази Андижон филиалида ичак касаллиги бўйича даволанаётган эди. Маълумотларга кўра, Садбархон Мамитова 2013—2015 йиллар оралиғида ўт пуфагида мавжуд хасталик боис жарроҳлик муолажасини олган.
«Ўт пуфагини лазер нури орқали олиш жараёнида нур ичак тизимларига шикаст етказган ва йиллар давомида чириш ҳолатига олиб келган. Июнь ойида касаллик белгилари кучайиши оқибатида у яна жарроҳлик столига ётқизилган эди», — дейди Мамитова хонимнинг «Дарё» мухбири билан суҳбатлашган яқинларидан бири.
Маълумот учун, Садбархон Мамитова 1966 йилда Андижоннинг Жалақудуқ туманида туғилган, 1982—1986 йилларда Наманган қишлоқ хўжалиги техникумида ўқиган, 1993 йил Тошкент давлат аграр университетини (сиртқи) тамомлаган. У узоқ йиллар Жалақудуқ туманида турли лавозимларда меҳнат қилган.
Хусусан, 2007—2008 йилларда туман ҳокими ўринбосари — туман хотин-қизлар қўмитаси раиси бўлган, 2011—2017 йилларда Жалақудуқ тумани Бандликка кўмаклашиш маркази директори лавозимларида ишлаган. 2019 йилдан «Юксалиш» умуммиллий ҳаракати Андижон вилояти ҳудудий бўлимига раҳбарлик қилган.
У 2020 йилнинг 4 мартидан буён Бўстон тумани ҳокими вазифасида ишлаб келаётган эди. Маълум қилишларича, Садбархон Мамитованинг жаноза маросими 31 июль, шанба куни соат 16:00 да Жалақудуқ туманида бўлиб ўтади.
Эслатиб ўтамиз, 2020 йил 29 сентябрида Андижон вилояти Хонобод шаҳри ҳокими Мусахон Мамадалиев ўткир юрак қон-томир етишмовчилиги касаллигидан, 7 октябрь куни вилоятнинг Олтинкўл тумани ҳокими Назиржон Ўринбоев пневмония касаллиги асоратлари ва ўткир юрак қон-томир етишмовчилигидан вафот этган эди. Бундан ташқари, 2017 йил октябрида вилоятнинг Улуғнор тумани ҳокими Асилбек Юсупов мияга қон қуйилиши оқибатида вафот этган.
Изоҳ (0)