Сурхондарё вилояти Бойсун туманида 15 июль куни ИИБ ходимлари ва фуқаролар ўртасида жанжал юзага келди, дея хабар бермоқда вилоят прокуратураси.
Маълум бўлишича, воқеа туманнинг «Тузбозор» маҳалласи ҳудудида жойлашган деҳқон бозори атрофида содир бўлган. Аниқланишича, «Газа» маҳалласи ҳудудида яшовчи Ф.А. ва С.Б. бозор олдида ташкил этилган блокпостда хизмат олиб бораётган профилактика инспектори ва бошқалар билан тортишган.
Таъкидланишича, у нима сабабдан блокпост ўрнатилгани ҳамда карантин фақат Бойсунда эмас, барча ҳудудларда амал қилишини айтиб жанжал кўтарган. Шунингдек, фуқаро Ф.А. «Газа» маҳалласида жойлашган «Газа» меҳмонхона ва ошхона раҳбари экани аниқланган.
Туман ички ишлар бўлими ходимлари томонидан ушбу ошхона 14 июль куни соат 21:20 атрофида карантинга қарши кураш қоидаларига риоя қилмасдан фаолият юритгани сабаб 3 430 000 сўм жарима маъмурий жазо чораси қўлланган. Ўрганишда ходимларнинг ҳаракатларида қонун бузилиши ҳолатларига йўл қўйилгани аниқланмаган.
Бундан аввал Деновда инспектор ёрдамчилари уриб ўлдириб қўйгани айтилаётган фуқаронинг рафиқаси мурожаат билан чиққани, «Самарқанд дарвоза» кўнгилочар савдо марказида ИИБ ходими ва фуқаро ўртасида тортишув юзасидан маълумот берилгани ҳамда Қашқадарёда фуқаролар МИБ ходимларининг устига бензин сепиб, ёқиб юбормоқчи бўлгани ҳақида хабар берилганди.
Изоҳ (0)