Туркияда ўрмон ёнғинлари бир неча кундан буён давом этмоқда, ёнғин курорт шаҳарларгача етиб келди. Мармарис шаҳри маъмурияти маҳаллий аҳоли ва сайёҳларни эвакуация қилишни бошлашга қарор қилди. Анталиядан сайёҳларни эвакуация қилиш масаласи кўтарилмаган. Россия ёрдам учун авиация юборди. Мамлакатдаги ёнғинлар ва унга қарши кўрилаётган чоралар ҳақида «РБК» фоторепортаж тайёрлади.
Ёнғинлар 28 июль куни кучли шамол ва иссиқ об-ҳаво туфайли бошланган. Улар Туркиянинг жанубий вилоятларига таъсир кўрсатди, жумладан, ёнғин ўчоғи Мармарис ва Анталия каби курорт шаҳарлар яқинида жойлашган (ёнғин Анталия вилоятидаги Манавгат шаҳри атрофида тарқалган).
Россия ёнғинни бартараф қилишга ёрдам бериш учун учта Бе-200 самолётини юборди. Ёнғинлар оқибатида уч киши ҳалок бўлган, юздан ортиқ одам жароҳатланган. 29 июлга келиб Манавгат туманидаги асосий ўчоқларни назоратга олишга муваффақ бўлинди, дейилади Туркиядаги Россия элчихонаси хабарида. Элчихонанинг таъкидлашича, асосий меҳмонхоналар ва сайёҳлик объектлари ёнғиндан узоқроқда жойлашган.
Туркия президенти Ражаб Эрдўғоннинг матбуот котиби Иброҳим Калиннинг фикрича, ўрмон ёнғинлари Туркия учун миллий фалокатга, ҳақиқий офатга айланган.
«Ўрмон ёнғинлари миллий офатдир. Бизнинг барча бўлимларимиз оловга қарши курашни мувофиқлаштирган ҳолда қаттиқ ишламоқда. Ёнғинларнинг сабаблари прокуратура томонидан ҳар томонлама ўрганилмоқда», — дейилади Калиннинг Twitter’даги постида.
У ёнғинларни бартараф этиш бўйича ишлар тўхтовсиз давом этишини таъкидлаган.
Мавзуга доир: Туркиянинг Анталия вилоятида катта ҳажмдаги ўрмон ёнғинлари кузатилмоқда (фото ва видео)
Калиннинг постидан бир соат олдин Twitter’да Туркия адлия вазири Абдулҳамид Гюл томонидан ёнғинлар тўғрисида хабар жойлаштирилган. Унинг қайд этишича, ёнғинларнинг сабаблари прокуратура томонидан текширилмоқда, прокуратура барча эҳтимолий версияларни кўриб чиқмоқда, давлат органлари эса зарур чораларни кўрмоқда.
Туркиянинг Бодрум шаҳри мэри Аҳмад Арас берган сўнгги маълумотларга кўра, Бодрумда ўрмон ёнғини ўчирилган. Эвакуация қилинган сайёҳлар ўз меҳмонхоналарига қайтди, ҳеч ким жароҳат олмаган.
Шаҳар мэрининг таъкидлашича, эвакуация пайтида ҳамма денгизга олиб чиқилган. Унинг сўзларига кўра, ҳозир Бодрумдаги барча ёнғинлар ўчирилган, «бетакрор ўрмоннинг катта майдони» ёниб кетган.
Арас қўшни Мармарис атрофидаги ёнғинлар ҳали бартараф этилмаганини қўшимча қилди. Аввалроқ Туркиянинг қишлоқ ва ўрмон хўжалиги вазири Бекир Пакдемирли етти вилоятда ўрмон ёнғинлари давом этаётгани ҳақида хабар берган.
Июль бошида Канадада аномал иссиқлик ортидан ўрмон ёнғинлари бошлангани, Кипрда мамлакат тарихидаги энг йирик ўрмон ёнғинлари содир бўлгани ҳақида хабарлар берилганди.
Изоҳ (0)