Тошкентда Италиянинг Пиза университети филиали очилади. Бу ҳақда Президент Шавкат Мирзиёев 29 июль куни Олмалиқ кон-металлургия комбинатининг янги мис бойитиш фабрикаси қурилишини бошлаш маросимида маълум қилди.
Президент матбуот хизматининг хабар беришича, давлат раҳбари тармоқда ишлаб чиқаришни ривожлантириш ва кадрлар тайёрлаш масаласига тўхталди.
«Рангли металларни қайта ишлаш занжирларини «хом-ашёдан – тайёр маҳсулотгача» деган тамойил асосида ривожлантиришимиз зарур. Ушбу йўналишда мис саноати ва унга турдош тармоқлар, яъни, электротехника, машинасозлик, металл қотишмалар ва турли металл маҳсулотлари саноатининг интеграциялашуви, хусусий сектор билан ҳамкорлик асосида амалга оширилади.
Шу мақсадда тегишли илмий-тадқиқот ва инновация марказлари ташкил этилади. Бу борада қўшма лойиҳаларни амалга ошириш учун етакчи хорижий компанияларни кенг жалб этамиз», — деган Президент ва барча даражадаги кадрлар — муҳандислар, химик-технологлар, операторлар, машинистлар ва бошқа техник ходимларни тайёрлаш бўйича ишлаб чиқариш корхоналари билан узвий боғланган, ягона тизим яратиш лозимлигини таъкидлаган.
«Жаҳон тажрибаси шуни кўрсатадики, мис ишлаб чиқаришда битта иш ўрнини ташкил этиш бошқа тармоқларда энг камида учтадан иш ўрнини яратишга олиб келади.
Ушбу йўналишдаги биринчи қадам сифатида биз россиялик шерикларимиз билан биргаликда Олмалиқ шаҳрида ‘МИСиС’ миллий тадқиқотлар технология университети филиалини ташкил этдик. Бундан ташқари, мамлакатимизда Геология фанлари университети ҳам ташкил этилди. У геология соҳасидаги 5 та илмий-тадқиқот марказини ўз ичига олади.
Университет базасида Москва давлат университети билан биргаликда қўшма таълим дастурини жорий этиш режалаштирилмоқда. Куни кеча Тошкентда геология фанлари йўналиши бўйича Италиянинг Пиза университети филиалини очиш ҳақида келишувга эришилди.
Бир сўз билан айтганда, саноат кластерларининг ташкил этилиши ушбу тармоқда ишлаб чиқариш ҳажмини камида 12 миллиард долларгача ошириш имконини беради», — деган Шавкат Мирзиёев.
Изоҳ (0)