Ўзбекистон мустақиллигининг 30 йиллиги муносабати билан ўтган йиллар давомида АҚШнинг Тошкентдаги дипломатик ваколатхонасини бошқарган элчилар бирлашиб, Ўзбекистон ва АҚШ муносабатларининг ривожланиш тарихини муҳокама қилади.
Ўзбекистоннинг АҚШдаги дипломатик ваколатхонаси ташаббуси билан ташкил этилган онлайн тадбирда элчи Жавлон Ваҳобов ва илгари АҚШнинг Тошкентдаги элчихонасини бошқарган саккиз нафар америкалик дипломатлар иштирок этади. Вебинарни АҚШнинг Миллий мудофаа университети (NЕSА) Яқин Шарқ ва Жанубий Осиё стратегик тадқиқотлари маркази профессори Брианн Тодд олиб боради.
Telegram’даги «Нигоҳ» каналининг ёзишича, вебинар 29 июль куни соат 17:15 да (Тошкент вақти билан) бошланади. Унда қатнашишни истаганлар қуйидаги ҳавола орқали олдиндан рўйхатдан ўтиши мумкин.
Аввалроқ АҚШ Ўзбекистондаги боғчалар учун 21 млн доллар ажратиши, АҚШ агентлиги Ўзбекистонда хусусий агробизнес корхоналари ўртасида бизнес лойиҳалар танловини ўтказиши, АҚШ Ўзбекистонга 131 тонналик озиқ-овқат ёрдамини топширгани тўғрисида хабар берилганди.
Изоҳ (0)