Андижон вилояти Олтинкўл туманида учта автомобиль иштирокида содир бўлган йўл-транспорт ҳодисаси оқибатида 26 ёшли фуқаро вафот этди. Бу ҳақда ИИВ ЙҲХББ ахборот хизмати хабар берди.
Маълум қилинишича, туманнинг «Ижтимоят» маҳалласида Damas автомобили юқори тезликда ҳаракатланиб келаётиб, ҳайдовчи бошқарувни йўқотиши оқибатида қарама-қарши йўлга ўтиб кетган. Оқибатда машина Nexia билан тўқнашган. Damas’нинг олд ўриндиғидаги йўловчи тан жароҳатлар олиб, касалхонада вафот этган. Эълон қилинган кадрларда яна бир Nexia-2 автомобиль ҳам тўқнашувда иштирок этганини кўриш мумкин.
Таъкидланишича, Damas ҳайдовчиси 3 ой олдин ҳайдовчилик гувоҳномасини олган. ЙТҲга унинг тажрибасизлиги ва катта тезликда ҳаракатлангани сабаб бўлган. Воқеа жойи ўрганилганда йўлга ётиқ чизиқлар чизилгани, йўл чироқлари ва белгилари ўрнатилгани аниқланган.
Ҳолат юзасидан терговга қадар суриштирув ишлари давом этмоқда.
Аввалроқ Бухорода Nexia ағдарилди, ҳайдовчи ва йўловчи машина тагида қолгани, Навоийда йўлдан чиқиб кетиб ағдарилган Nexia-3’да бир киши ҳалок бўлгани, Тошкентда иккита Mercedes ва Nissan иштирокида ЙТҲ содир бўлгани тўғрисида хабар берилганди.
Изоҳ (0)