26—27 июль кунлари Қашқадарё вилоятида кучли шамол ва чанг бўронлари кузатилди. Бунинг оқибатида юзлаб уйлар электр энергияси таъминотидан узилиб қолган, деб хабар беради вилоят Уй-жой коммунал хизмат кўрсатиш бошқармаси ахборот хизмати.
Айниқса, кучли шамол Косон ва Чироқчи туманларида, шунингдек, Қарши шаҳрида кузатилган. «Қашқадарё ҳудудий электр тармоқлари» АЖнинг маълум қилишича, вилоятидаги электр тармоқларининг 5—10 фоизига жиддий шикаст етган. Талафотларни бартараф этиш учун 60 дан ортиқ гуруҳ тузилган, улар кеча-ю кундуз таъмирлаш ишларини олиб бормоқда.
Маълум қилинишича, шамол оқибатида Қарши шаҳар «Гунгон» МФЙда жойлашган 3-сонли кўп қаватли уй-том қисмининг 80 метр квадрат тунука қопламаси зарарланган. Қашқадарё вилоят Фавқулодда вазиятлар бошқармаси мутахассислари қисқа муддатларда воқеа жойига етиб бориб табиий офат оқибатларини бартараф этган.
Таъкидлаш керакки, «Ўзгидромет» 25—26 июль кунлари республиканинг баъзи вилоятларида шамол тезлиги 25-30 метр/сониягача кучайиши мумкинлигини маълум қилганди.
Изоҳ (0)